Алай вахтунда Дагъустанда коронавирусдихъ галаз женг тухун неинки шегьеррин клиникайра, гьакI яргъара авай дагълух районрани вини дережада аваз тешкилнава.
Санлай къачурла, республикада садакай масадак акатдай азар чукIунихъ галаз алакъалу гьалар гуьзчивилик кутаз алакьнава. Ихьтин зенд медицинадин рекьяй куьмекар гун патал Москвадай чи республикадиз атай духтуррин жергедик хьайи анестезиолог-реаниматолог Егор Ларина “ТАСС” чешмедиз раижна.
Е.Ларин Москвадин 40-нумрадин клиникадин азарханадин духтур, медицинадин са жерге проектрин эксперт я. “Дагъустанда исятда вири гуьзчивилик кутунва, гьатта яргъа авай районарни дарманралди, такьатралди таъмин я. Вири кIвалахар Минздравдин теклифрал амална, кьиле тухузва. Чна чи тежрибани чирзава, тIугъвал куьтягь хьайидалай кьулухъни виже къведай теклифар, меслятар гузва”, — лагьана Е.Ларина.
Командировкадин вахтунда ам духтуррин дестедихъ галаз Махачкъаладин пуд азарханада, Избербашдин, Белиж поселокдин, Леваши, Унцукуль, Ахцегь ва республикадин дагълух маса хуьрерин медицинадин идарайра хьана.
«Лезги газет»
