Играми газет кIелзавайбур! Малум тирвал, Къуръандин аятриз жуьреба-жуьре чIа­ларалди баянар ганва. И кардихъ авай метлебдикай, Къуръандиз талукь умуми тариф­дикай кхьенвай гегьенш макъалаяр виликдай “Лезги газетдизни” акъатнай. Дамахиз жедай кар ам я хьи, Къуръандин аятриз лезги чIалални баянар ганва. Араб чIалай таржумаяр авунвайди чи газетдиз диндин макъалаяр кхьизвай алим Ямин Мегьамедов я.

И нумрадилай гатIунна “Къуръандин аятрин баянар” рубрикадик кваз чна винидихъ тIвар кьур авторди авунвай таржумаяр чапда. И карди лезги чIалал акъатзавай газет кIелзавайбуруз (виридаз араб ва я урус чIал чин тийизвайди фикирда кьуна) Къуръандин келимайрин кьетIенвал, мана-метлеб, сирер, къуват чирдай мумкинвал гуда.

1-жуз

Сура: “аль — Фатигьагь”

1- Сура: “Ачухзавайди”

1. Мергьяматлу, Регьимлу Аллагьдин тIварцIелди!1
2. (Вири) гьамд (шукур) хьуй Аллагьдиз, (вири) алемрин Раббидиз,
3. Мергьяматлудаз, Регьимлудаз,
4. Эвездин Йикъан Меликдиз (авур крарин гьакъи хгудай Йикъан сад тир Пачагьдиз, Гьукумдардиз)!
5. (Анжах) Ваз чна ибадатзава ва (анжах) Вавай чна куьмек тIалабзава!
6. (Вуна) чун Дуьз Рекье аваз твах2.
7. Рекье аваз — Вуна няметар (иман, диндарвал) гайибурун, чеб Ви ажугъдик (гъазабдик) акатнавайбурун ваъ (гьахъ чиз амал тавуна), ва чеб (Дуьз) Рекьелай алатайбурун ваъ (гьахъ, чирвилер квадарна, ягъалмишвиле гьатна).

Сура: “аль-Бакъарагь”

2- Сура: “Кал”

Мергьяматлу, Регьимлу Аллагьдин тIвар­цIелди!

1. Алиф, лям, мим (И аятдин мана са Аллагьдиз хъсан чида).
2. А Ктаб (Къуръан) — виче са шакни авачир­­­ (ам Аллагьдин патай тирди) — регьбер­вал­­ (дуьз рехъ къалурдайди) я (Аллагьди­хъай) кичIебуруз (Адан эмирар кьилиз акъу­диз­ ва Адан къадагъайрикай яргъа тирбуруз).
3. Чпи, гъайбдихъ (вилерикай чуьнуьх тир чинебан крарихъ): Эхиратдихъ, Женнетдихъ, малаикрихъ… инанмишвал ийизвайбуруз ва капI ада ийизвайбуруз (вахтунда, дуьз къайдада кьилиз акъудзавайбуруз) ва чпиз Чна ганвайдакай (мал-девлетдикай Аллагьдин рекье) харж ийизвайбуруз.
4. Ва чпи, ваз “(авудна) ракъурнавайдахъ” (Къуръандихъ) ва валай вилик “(авудна) ракъурнавайдахъни” (Таврат, Инжил) ва инанмишвал ийизвайбуруз, ва Эхиратдихъни абуру якъиндиз инандирмишвалзава.
5. Ахьтинбур — чпин Раббидин патай тир дуьз рекьел ала ва ахьтинбур — гьабур я (еке) агалкьунар жедайбур!
6. Гьакъикъатда, чпи кафирвал авурбур — абуруз сад хьиз я вуна абуруз игьтиятвал авунин хабар гайитIани, ва я вуна игьтиятвал авунин хабар тагайтIани, (абуру) иман гъидач.
7. (Абуруз гьахъ чир хьайидалай кьулухъ терсвал авуна кафирвал авурвиляй) Ал­лагьди абурун рикIерал ва абурун япарал муьгьуьр эцигнава, ва абурун килигунрал (ви­лерал) “перде” ала, ва абуруз чIехи азаб жеда!
8. Ва ава инсанрин арада: “Чна Аллагьдихъ ва Эхиримжи Йикъахъ иман гъанва” лу­­­­гьуз­­вайбурни, амма абур агъунвайбур туш (абур мунафикьар я — мецел лугьузва чпи иман гъанва ва рикIе агъун тавуна кафирар я).
9. Абуру фикирзава (чпин авамвиляй абуру) Аллагь ва иман гъанвайбур алдатмишзавай хьиз (винелай иман къалуриз рикIе куфр чуьнуьхиз), амма абуру анжах чеб алдатмишзава, чпиз гьич хабарни тушиз.
10. Абурун рикIера азар (шак) ава, ва Ал­лагьди абуруз азар мадни артухарнава, ва абу­руз азиятлу азаб жеда тапарар авурвиляй­ (ри­­кIе куфр аваз мецел таб лугьузвай­ви­ляй)­.­
11. Ва абуруз лагьайла: “ЧIурувилер чукIурмир куьне чилел!” (куфр, гунагьар ийиз), абуру лугьузва: “Чун — анжах дуьз крарзавайбур (хъсанар хъийизвайбур) я”.
12. Аксина! Гьакъикъатда, абур — чIуруви­лер чукIурзавайбур (чеб) я, амма абуруз а кар хабар туш (гьиссзавач).
13. Ва абуруз (мунафикьриз) лагьайла: “Иман гъваш куьнени инсанри (Пайгъамбардин асгьабри) иман гъанвайвал”, абуру лу­гьузва: “Бес, чна иман гъидани кьван сефигьри (акьулдиз кьезилбуру) иман гъайивал?” Туш! Гьакъикъатда, абур чеб я сефи­гьар, амма абуруз чизвач (чпин ягъалмишвал)!
14. Ва иман гъанвайбур гьалтайла, абуру лугьузва: “Чна иман гъанва”, ва чпин шей­тIанрихъ галаз (кьилди) амукьайла, (абуру) лугьузва: “Гьакъикъатда, чун квехъ галайди я, чун (муъминрикай) ягьанатарзавайбур я”.
15. Аллагьди абурукайни “ягьанат” ийида­ ва Ада абуруз чпин “асивализ сергьятар чIуру­нин карда” (куфрда ва терсвиле) амукьун ар­тухарда, чебни буьркьуьвилеваз, шаклувилеваз!

Къейд: Ямин Мегьамедова Къуръандин аятриз лезги чIалал ганвай баянар Урусатдин мусурманрин Духовный управлениди ва уьлкведин муфтийрин Советдин председатель Равиль Гайнутдина тестикьарнава.

(КьатI ама)

Таржума авурди — Ямин  Мегьамедов

_____________________________________

1  (“БисмиЛлягьи-р-Рагьмани-р-Рагьим”- дихъ: — Аллагьдин тIварцIелди Мергьяматлудан, Регьимлудан! — манани ава)

2  Вуна чаз Дуьз рехъ къалура, ахпа чун а Дуьз рекьел гъана а Рекьеваз эхирдалди твах (вучиз ла­­гьай­тIа, ава инсанар Дуьз рехъ гьич чин тийизвайбур (кафирар), ва ава инсанар Дуьз рехъ чиз, а рекьяй фин тийизвайбур (чувуд-диндал алайбур), ва ава инсанар Дуьз рекьел атана, ахпа анай акъатна­вайбур эхирдалди тефена, я Дуьз рехъ квадарна, я гадарна (насара-яр), ва ава инсанар “чпиз Ал­лагьди няметар ганвайбурун” рекьел алайбур (абур 4-сурадин 69-аятда къалурнава, яни пайгъамбарар, “сиддикьар” (керчек ксар), шагьидар, “салигьар” — ва са гьабур я Дуьз рекьевайбур)!