Алатай ислен юкъуз Махачкъалада, Дагъустандин зегьметдин ва яшайишдин рекьяй вилик финин министерствода, республикада “Жегьил пешекарар. Ворлдскиллс Россия” милли чемпионатдиз хкядай пай кьиле тухуниз талукь яз колледжрин директоррихъ галаз видеоконференция кьиле тухвана. Малум тирвал, алай вахтунда дуьньядиз чкIанвай коронавирусдин азарди инсанар адет хьанвайвал акъажунар, мярекатар кьиле тухуникай магьрумнава. Гьаниз килигна, цIи винидихъ тIвар кьунвай акъажунрин хкядай пай онлайн къайдада кьиле тухудайвал я.
КIвалахдин рекьяй собрание РД-дин зегьметдин ва яшайишдин рекьяй вилик финин министерстводин жегьилар кIвалахдалди таъминардай республикадин “Агалкьун” (РМЦЗ) центрадин, Россиядин Ворлдскиллс ва “Абилимпикс” чемпионатрин РКЦ -дин (региональный координационный центр) кьиле авай ксари кьиле тухвана.
Видеоконференциядал и акъажунар кьиле тухун патал конкурсдин майданар туькIуьруниз талукь месэлаяр веревирдна. Конкурсрин иштиракчийри онлайн-форматда 16 пешедай чпин устадвал ва алакьунар къалурда. Абур лагьайтIа, алай йисан августдиз кьиле тухудайвал я.
Чи мухбир
