Гьар йисан 1-июнь дуьньядин 50-далай виниз уьлквейра аялар хуьдай международный югъ яз къейдзава. Вучиз ам гатун сад лагьай юкъуз кьиле тухузватIа тестикьарзавай делилар авач, им акьван важиблу карни туш. Сифтедай и югъ обществода аялрин ихтиярар чIуруниз рехъ тагун патал арадал атанай. Дуьньядин Кьвед лагьай дяведин ва адалай гуьгъуьнин йисарани аялар гзаф къазайрик акатна. Дяведин цIаяр куьтягь хьайила, адан ялаври агажарнавай уьлквейри чеб гуьнгуьна хтун патал зегьметар чIугваз, гележегдикай фикирар ийиз эгечIна. Гьа икI и йикъан метлеблувални артух хьана. Гуьгъуьнлай и йикъан сергьятра аваз аялар машгъулардай мярекатар кьиле тухун адетдиз элкъвена.
Эхиримжи йисара и югъ чи республикадани аялрин рикIел яргъалди аламукьдай мярекатар, конкурсар (шикилар чIугуниз, шиирар кIелуниз талукь ва икI мад) кьиле тухуналди къейдзавай. ЦIи лагьайтIа, вири дуьнья къурхулувилик кутур коронавирусдин садакай масадак акатдай азардихъ ва инсанар самоизоляциядин шартIара хьунихъ галаз алакъалу яз гзаф аялрин иштираквал аваз и югъ къейдначтIани, амма аялар сувар авачиз тунач. Гзаф чкайра мярекатар онлайн-режимдин къайдада, яни интернетдикай менфят къачуналди кьиле тухвана, аялар шадарна.
ИкI, Сулейман-Стальский районда и юкъуз аялри онлайн-тебрикар гьазурнавай, жуьреба-жуьре соцсетра флэшмобар, онлайн-выставкаяр, аялри гьазурнавай куьлуь затIарин (поделки), музыкадин нумрайрин, гьакIни гъили чIугунвай шикилрин “Дуьнья аялрин вилералди” онлайн-конкурсар кьиле тухвана. Мярекатар тешкилнавайбур райондин образованидин ва культурадин управленияр тир.
И йикъан сергьятра аваз Сулейман-Стальский райондин кьил Нариман Абдулмуталибова тIимил таъмин хизанрай тир кьве аялдиз планшетар, недай-хъвадай суьрсетар, 25 аялдиз школада бакара къведай шейэрикай ибарат тир наборар ва гьар садаз 1 агъзур манат гана.
— Квез Аялар хуьдай югъ мубаракрай! И югъ — чи, чIехибурун хиве, гьар са аялдин уьмуьрдин, сагъламвилин ва кьисметдин жигьетдай жавабдарвал авайди нубатдин сеферда рикIел хкун я. Аялар чи девлет я. Чна абур патал зегьмет чIугвазва ва планар туькIуьрзава, чун абур патал яшамиш жезва, абурухъ хушбахт гележег жедайдак умуд кутазва. И крар кьилиз акъудунин мураддалди чна, чIехибуру, аялрин къайгъударвал ва жавабдарвал чIугун, абуруз чIехи-гъвечIидаз гьуьрмет ийиз, хъсан ва писди чирун герек я. Им вири обществодин, гьар са касдин эвелимжи буржи я. Къуй вири аялрихъ сагъвал, ислягьвал ва хушбахтвал хьурай! Къуй чи бицIекрихъ экуь, шад ва са дердини авачир аялвал хьурай! Къуй абурун сиверилай мили хъвер садрани алат тавурай, мурадарни гьамиша кьилиз акъатрай,-алхишна райондин кьили.
И йикъан сергьятра аваз “Рычал-су” заводдин кьиле авай ксарини тIимил таъмин 20 хизандай тир аялриз пулдин куьмекар гана.
Чи мухбир
