Каспийск шегьерда “Яшамиш жедай чка ва шегьердин шартIар” милли проектдай 2020-йисан эхирдалди 1000 ученикдиз чкаяр жедай цIийи кьве мектеб эцигда, хабар гузва “ТАСС” чешмеди.
“Гьар са мектебда 500 ученикдиз чкаяр жеда. Чара авунвай такьатрин кьадар 1 миллиардни 98 миллион манатдилай са тIимил артух я. Адакай 1 миллиардни 43 миллион манат федеральный бюджетдин такьатар я. 12-нумрадин юкьван умуми образованидин мектеб шегьердин 10-нумрадин микрорайонда эцигзава, 13-нумрадин мектеб – 11-нумрадин микрорайонда. Исятда кьве объектдални эцигунрин кIвалахар кьиле физва”, — малумарна РД-дин эцигунрин ва ЖКХ-дин министерстводи.
Къейдзавайвал, республикада кардик кутунвай гуьзчивилин постар (коронавирусдихъ галаз алакъалу яз) себеб яз, эцигунрин материалар чкадал агакьарзавай машинри рекьера гьерекат авунин карда тайин четинвилер жезвайтIани, кIвалахар графикда къалурнавай кьадардилай артухни тамамарна. Мектебрин дараматар алай йисуз ишлемишиз вахкун пландик кутунва.
РД-дин образованидинни илимдин министерстводин делилралди, республикада 1460 мектеб ава, абурукай 616-да кьве сменада кIвалахзава, 22-да — пуд сменада. 2018-2019-йисара регионда 12 агъзур ученикдиз чкаяр жедай 34 мектеб эцигна. Пуд смена тергунин ва авария хьунин гьалда авай 42 дараматда кIелзавай ученикар цIийи мектебриз ахкъудунин мураддалди республикадин гьукумди 2024-йисалди мад 82 мектеб эцигун фикирдик кутунва. Санлай къачурла, алай йисуз республикада 5500 ученикдиз чкаяр жедай 15 цIийи мектеб кардик кутадайвал я.
«Лезги газет»
