19-декабрь. Махачкъаладин 30-нумрадин лицейда гзаф инсанар кIватI хьанвай. Ана и лицей чи ватандаш, Россиядин ФСБ-дин капитан Бабаев Артур Амирхановичан тIварунихъ ягъуниз ва мектебдин цлал мемориалдин кьул ачухуниз талукь мярекатар кьиле фена.
Мярекатдиз РД-дин Гьукуматдин Председателдин везифаяр вахтуналди тамамарзавайдан Сад лагьай заместитель Анатолий Къарибов, РФ-дин ФСБ-дин РД-да авай управленидин начальникдин заместитель Юрий Коваленко, ветеранрин крарин рекьяй комитетдин председатель, СССР-дин КГБ-дин генерал-майор Омар Муртазалиев, Артуран буба Амирхан Бабаев, мукьва-кьилияр, адан муаллимар, ярар-дустар, общественный тешкилатрин векилар атанвай.
Мектебдин вилик Анатолий Къарибова А. Бабаеван кьегьалвилер рикIел хкана. Ахпа мемориалдин кьул ачухна. Мектебда кIелзавай аялри, ислягьвилин лишан яз, цавуз шарар ахъайна. Идалай кьулухъ митингдин иштиракчияр актовый залдиз хкаж хьана. Ина 30-нумрадин лицейдин ученикри ватанпересвилин манияр тамамарна, и школа акьалтIарай Артур Бабаеван экуь къаматдиз гьуьрметзавайди гьиссиз туна.
Артур Бабаевакай, ватанперес кьегьал хцикай, игитдикай хьиз, Юрий Коваленко, Омар Муртазалиев, Махачкъала шегьердин образованидин управленидин начальник Тагьир Мансуров, жегьилриз ватанпересвилин тербия гунин, генерал-полковник М.Танкаеван тIварунихъ галай фондунин председатель Гьасангьуьсейн Абдулжелилов, ДГПУ-дин жегьилрин крарин рекьяй ва информационный политикадин управленидин начальник Руслан Гереев ва масабур рахана.
— Лицейдиз чи къуллугъчидин тIвар гуникай хабар чна шаддиз кьабулна, — къейдна Ю.Коваленкоди. — Ракьун рекьел хъиткьиндай шейиникай гзафбур къутармишун патал Артур Амирхановича вичин чан къурбандна. Куьне фикирдиз гъваш, вичин чанни гьайиф татана, ада хъиткьиндай шейэр шумудра зарарсуз авунатIа ва шумуд виш кас кьиникьикай къутармишнатIа. Сагърай куьн, ихьтин кьегьал хва рикIелай ракъур тийизвай. Артур Амирханович ватанпересвилин, игитвилин чешне я.
Омар Муртазалиева Артур Бабаев виридан фикирда кьегьал хва хьиз авайди къейдна. Рахай гьар сада ихьтин хва тербияламишай диде-бубадиз сагърай лагьана.
РФ-дин ФСБ-дин капитан Артур Бабаеван тIварунихъ галай Махачкъаладин 30-нумрадин лицейдин директор Гуьлнара Абдуллаевади ва муаллимри А.Бабаев гьихьтин ученик тиртIа, ам чпин рикIяй садрани акъат тийидайди къейдна.
Артуран буба Амирхан Бабаева чими келимаяр лугьунай, вичин хва рикIера хуьнай виридаз сагърай лагьана.
* * *
Капитан Артур Бабаева гьа и лицейда кIелна. Россиядин ФСБ-дин къурулушра кIвалахна, хъиткьиндай 43 шей хатасуз авуна. 2009-йисан 2-июлдин йифиз ракьун рекьин “Уйташ” переезд хъиткьинаруникай хабар агакьна. Поездрин гьерекат акъваз хьанай. Артур Бабаев оперативный силисдин дестени галаз чкадал фена ва кIвалахрив эгечIна. Инал алайбур хатасуз мензилдиз акъудна, чка ахтармишиз башламишна. Садлагьана мад хъиткьинна. Залан хирер хьайи капитан телеф хьана. Кьегьал хва “Жуьрэтлувилин ордендиз” лайихлу хьана. Рагьмет хьурай вичиз. Ам чи рикIера эбеди яз амукьда.
Дагъви Шериф
