Герейханован хуьруьн 1-нумрадин Р.Османован тIварунихъ галай школадиз мугьман хьайила анин директор Мадина Надировнади хъсан муаллимрикай суьгьбетна. Им районда чIехибрукай са школа я.
Ада, Туьркменистандин Ашхабадда государственный университет акьалтIарна, 1995 йисалай хайи районда кIвалахзавай Ханова Альбина Шабановнадин тарифна.
Школадиз атай сифте йикъалай башламишна коллективдин арада вичиз гьуьрмет къазанмишай Альбина Ханова 1972-йисуз Кьасумхуьрел рабочийдин хизанда дидедиз хьана. 1989-йисуз хайи хуьре школа хъсан къиметралди куьтягьай рушаз Д.Азадидин тIварунихъ галай Туьркменистандин госуниверситетдин урус чIаланни литературадин факультетдик экечIун кьисмет хьана. 1995-йисуз ада хайи хуьруьн юкьван школада вичин пешедай кIвалахиз башламишна.
Герейханован хуьряй тир Ханов Къафланан хва Даирахъ галаз уьмуьрар сад авур Альбинади 1998-йисалай гьа ина 1-нумрадин школада кIвалахни ийизва.
Альбина Шабановна 1-категориядин муаллим я. Ада тарсар гузвай аялри райондин конкурсра, олимпиадайра хъсан нетижаяр къалурзава.
Альбинадихъни Даирахъ 1 хвани 2 руш ава. Марата Воронежда гьавадин дяведин академиядин 5-курсуна, Лейлади Дербентдин медучилищедин 3-курсуна, гъвечIи руш Саняди Герейханован 1-хуьрун школадин 6-классда кIелзава.
Герейханован хуьруьн вири агьалийри Хановрин хизандал лайихлудаказ дамахзава.
Вадим Жамалдинов
