Дербент райондин хуьруьн майишатдал машгъул мулкдарри РФ-дин Президентдин РД-дин гьамишан векилдихъ галаз санал Москвада кардик квай дяведин ветеранрин 3-нумрадин госпиталдиз (исятда ам COVID19 азар акатнавай яшлу ксар сагъардай махсус азарханадиз элкъуьрнава) салан майваяр ракъурна, хабар гузва “Дагъустан” информагентстводи.
Дагъустанвийри и кардик “Духтурриз чухсагъул” лишандик кваз кьиле физвай вирироссиядин тедбирдин сергьятра аваз кьил кутуна. Тешкилатчийри къейдзавайвал, Дагъустандин хуьруьн майишатдал машгъул ксари гележегдани Москвадин ва областдин медицинадин идарайриз чкадин суьрсетар агакьардайвал я.
Четин макъамда меркездин духтуррин кIвалахдиз еке къимет гунай госпиталдин кьиле авайбуру дагъустанвийриз сагърай лагьана.
«Лезги газет»
