Россиядин МЧС-дин Кьилин Управленидин УНД-дин ва ПР-дин Махачкъаладин Ленинский районда авай гуьзчивалдай отделди гатфар ва гад алукьай береда агьалийри хаталу шартIара кьурай векьерик ва зирзибилдик цIай кутун тавуниз эвер гузва. И кардал амал тавур гьар сеферда неинки чун элкъвена кьунвай тIебиатдиз, гьатта инсанрин сагъламвилиз, дараматриз, автотехникадизни… еке зарар жезва. Ихьтин чIуру нетижайрал гъун тавун патал герекзавайди анжах са шартI — мукъаятвал квадар тавун я. Тек-туьк вахтара инсандин тахсир авачизни цIай кьун мумкин я, мисал яз, цIайлапанар ягъуникди…
Гатфариз, гатуз кьурай векьериз, пешериз цIай ягъунин карда сифтедай са еке хата авачир хьиз аквада, гзафбуру им хийирлу кIвалах, яни чил миянарзавайди яз гьисабзава. Им, гьелбетда, ягъалмишвал я. Ида еке мусибатрал, вишералди квадратный метрияр кунал гъизвайди рикIелай ракъурун дуьз туш. Векьиз цIай ягъуникди тамар ва тамук квай чкаярни кузва, чуьллера лагьайтIа, цIудралди йисара мад затIни экъечI хъийидач. ЦIу вичин хурук акатай вири затIар — набататар, гьашаратар, гьайванрин ва нуькIверин шарагар тергзава.
Идалайни гъейри, кьурай векьериз, иллаки рекьин къерехра авайбуруз, цIай ягъунин нетижада гьавадиз гзаф зегьерлу шейэр акатзава. Гуьгъуьнлай чна зегьерлу шейэр квай гьавада нефес чIугвазва. Нетижада рикIин ва астмадин азарар авайбурун гьал иллаки пис жезва.
ИкI тахьун патал агьалийри кьурай векь квай чкайриз, зирзибилдиз цIай ягъун, чуьллера цIаяр хъувун къадагъа тирди рикIелай ракъурна виже къведач.
Къе-пака гзафбур тIебиатдал ял ягъиз фида. Гьар са касди, гьам чIехибуру, гьамни аялри хатасузвал таъминарунин къайдайрал амал авун лазим я. РикIел хуьх: цIай хкадарунилай адан вилик пад кьаз регьят я. Гьаниз килигна ял ягъай чкайрал цIай кумай кIарасар, пIапIрусрин кьатIар тамир. ЦIай кьунвай чка акуртIа, фикир тагана элячIмир, эгер куь къуватар акакьзавачтIа, “112” нумрадиз зенгна, цIаяр хкадардайбуруз хабар це.
Идалайни гъейри, цIухъ ва хаталувал авай маса чешмейрихъ мукъаятсуздаказ эгечIуналди РФ-дин административный правонарушенийрин гьакъиндай Кодексдин 20.4 статьядин 1-паюнай административный жавабдарвилиз чIугун къалурнава. ИкI, идараяр ва карханаяр 150-далай 200 агъзурдав, къуллугърал алай ксар 6-далай 15 агъзурдав ва амай агьалиярни 2-далай 3 агъзурдав агакьна жерме ийидай ихтияр ава.
Гьич са чIавузни мукъаятвал квадармир, куь хатасузвал квелай аслу тирди рикIелай ракъурмир! Са гьихьтин ятIани дуьшуьш арадал атайла, тади гьалда “112” нумрадиз зенгна, къутармишдайбурун къуллугъдиз хабар це.
Б.Гьажиев, къенепатан
къуллугъдин лейтенант
