Чи ватанэгьлияр — гьар сана

Харьковда яшамиш жезвай чи жегьил ватанэгьли  Мурад  Мамедов  16 йисан яшда авай чIавалай милли кьуьлерал машгъул жезва. Алай вахтунда ада лезгинка кьуьл чирдай “KavkazDance” тIвар алай мектебдиз ва ихьтин тIвар алай ансамблдиз регьбервал гузва.

Мурад Рустамович Азербайжандай Украинадиз куьч хьайи лезги хизанда Харьков шегьерда 1994-йисуз дидедиз хьана. Шегьерда ада  алишверишдинни экономикадин университет куьтягьна. Гзаф терефрихъай алакьунар авай, гъиляй гьар са кар къведай жегьилди велосипедрин спортдизни итиж ийизва.

2012-йисуз Харьковда “Самур” ЛКО-дин куьмекдалди кьуьлер чир­дай гьяддин мектеб ва кьуьлердайбурун ансамбль тешкилна. Ина Мурад вичин вахарихъ галаз кьуьлер чирунал машгъул хьана. Са тIи­мил чIавалай милли кьуьлерин мектебдин муаллим яшамиш жезвай чка дегишаруниз мажбур хьана, и кардихъ галаз алакъалу яз, кьуьлер чир­дайбу­рун дестени чкIа­на. И ма­къамра та­нишри Мурадаз лезгинка кьуьлуьнин мектебдин кьиле акъвазун ва кар давамарун теклифна. Ви­чин рикI алай кар тирвиляй ада махсус зал кирида къачуна ва кьуьлерал рикI алайбурун кIватIал агуд хъувуна. Гуьгъуьнлай вад йисан къене са шумуд зал дегишарунизни мажбур хьана. Инай-аниз, анай-иниз къекъуьнар тахьун­ патал жегьилди вичин участокда авай имаратдикай кьуьлерин студия арадал гъана, анаг гуьз­гуьй­рал­ди ва герек тир маса тадаракралди таъминарна. Хсуси зал кардик кутурдалай кьулухъ Мурада кIва­тIалрин кьадарни артухарна.

“Кавказдин кьуьлер чпин четинвилелди маса кьуьлерилай гьам физический, гьамни техникадин жи­гьетдай тафаватлу жезва. Гьавиляй иниз къвезвай вирибурувай яргъалди давам гуз жезвач, амукьзавайбур къастунал кIевибур, къуватлубур я”, — лугьузва Мурад Мамедова­.

Мурадан мектебдиз туьнт кьуьлерал рикI алай Украинадин агьалийрини итиж ийизва. Алай вахтунда адан “KavkazDance” ансамблдик гзафни-гзаф лезгияр (КцIарай, Да­гъустандай) ква. Исятда кьуьлер чи­­рунин карда цIуд касди зегьмет чIуг­вазва. Сифтедай абуру фес­ти­валра, мергьяматлувилин концертра иштиракиз, чпин алакьунар жеми­ятдин арада къалуриз эгечIна. Гьелбетда, ихьтин мярекатра пулдин­ та­кьатар ва нуфузлувал кьуьлердайбуру ваъ, концертрин тешкилатчийри къазанмишзавай. Гуьгъуьнлай Мурадан регьбервилик кваз теж­р­и­балу кьуьлердайбурун дестеди жуь­реба-жуьре шад мярекатра, меж­лис­ра иштиракиз башламишна. И карди мектебдиз ва гьар са иштиракчидиз хъсан къазанжиярни гъана.­

Лезгинкадилай гъейри, дестедин репертуардик аваррин, дагъвийрин ва гзаф маса кьуьлерни ква. Ватанэгьлиди арадал гъанвай мектебда далдам ягъиз чирунин рекьяйни чирвилер, вердишвилер къачудай мумкинвал ава.

Мурада туькIуьрай видеодин тарсариз “Ютубда” килигайбурун кьадар са тIимил вахтунда 2 миллиондилайни алатна. Гуьгъуьнлай адан кIвалахрикай Москвада кардик квай “KavkazDance” тIвар алай лезгинка кьуьл чирдай мектебдин регьбер Рустам Алиеваз хуш атана.

“Пуд хореографни галаз чи мектебдиз Р.Алиев атана, сада садан тежриба чирна, абуру чаз хъсан теклифарни меслятар гана. Гьа чIава­лай инихъ, абурун теклифдалди, чна­ чи мектебдизни ансамблдиз “KavkazDance” тIвар гана”, — лугьуз­ва М. Мамедова.

Къейдзавайвал, кьуьлерин мектеб вилик финик Харьковда авай “Самур” лезги культурадин тешкилатди еке пай кутуна. Же­гьил­дин алахъунриз са вахтунда ше­гьерда авай лезгийри алакьдайвал жуьреба-жуьре куьмекар гана. И барадай ада сифте нубатда лезги меценатар тир Къадир Адилован, Айнутдин Мамедован ва Бедел Беделован тIварар кьазва.

Къариблухда милливал хуьнин рекье кагьулвални галатун течизвай жегьил ватанэгьлидихъ гьар са карда агалкьунар хьун чи мурадни я.

К. Ферзалиев