“Вири уьмуьр чирвилер патал гана лагьана гьелелиг садни пашман хьанач” — лагьанай вичин девирда Рудакиди. Чпин савадлу вири уьмуьр илимдиз бахш авур инсанар санлай Лезгистандин хьиз, вичиз дагълара авай шегьер лугьузвай къадим Ахцегьрин берекатлу чилини гзаф гана. Эхь, мисалда лугьузвайвал, тар зурбади хьун адалай вичелай ваъ, ам экъечIзавай чилелай-накьвадилай аслу я.
Ахцегьай акъатай, гъвечIи ватан — Лезгистан яргъарани машгьур авур алимрин кьадар гзаф я. Къадим и хуьр тамам тухумрини машгьурна. Ахцегьрин, Дагъларин уьлкведин тIвар сейли хьуник республикадилай яргъарани машгьур хьайи алим, илимрин доктор, профессор Руслан Пирметович Мейланован еке пай квайди якъин я.
Гьайиф хьи, Р.П. Мейланов къе чи арада амач, 2015-йисуз ам рагьметдиз фена, гъиле-фикирда кьилиз акъудиз кIанзамай илимдин кIвалахар, рикIе къени ниятар, къастар амаз. Хиялдиз Овидийдин келимаяр къвезва: “Йисар гьисабун са куьнизни туш: инсанар яргъалдини яшамиш жезва. Кар йисара авач, авур кIвалахра ава — гьабур гьисабна кIанда”. Хайи халкь, республика, уьлкве паталди вичин са акьван яргъиди тушир уьмуьрда Руслан Пирметовича зурба, са бязи ксаривай тамам асирда, гьадалайни гзаф вахтунда алакь тийидай крар авуна. Теоретический физикадин, геотермиядин месэлайрай Р.Мейланов Россиядин Федерациядин лап хъсан, зурба алимрин жергеда авай.
Руслан Пирметович Мейланов 1950-йисан 8-майдиз къадим Ахцегьрин хуьре дидедиз хьана. Ада хуьруьн юкьван школа вири предметрай “5” къиметар аваз акьалтIарна. Гьеле школада кIелзавай йисара ада вич кьетIен алакьунар, зигьин авай жаван яз къалурна. Гьавиляй ам Дагъустандин государственный университетдин физический факультетдик экечIна, 1972-йисуз анаг хъсан къиметар аваз акьалтIарна.
Руслан Мейланова Ленинграддин государственный университетдин физический факультетда “Квантовые кинетические уравнения в теории взаимодействующих электрон-фононных систем” темадай дипломдин кIвалах тамамарна.
1974-1977-йисара Руслан Мейланова А.Жданован тIварунихъ галай Ленинграддин госуниверситетдин физический факультетдин статистический физикадин теоретический отделдин кафедрада аспират яз кIвалахна.
1977-йисуз и университетда Руслан Пирметовича агалкьунралди кандидатвилин диссертация хвена.
Жегьил алим Руслан Мейланов Дагъустандиз хтана. Ада 1978-1983-йисара Дагъустандин государственный университетдин физический факультетда сифтедай младший, гуьгъуьнлай старший илимдин къуллугъчи яз, 1983-1986-йисара Дагъустандин государственный педагогический институтдин физический факультетдин теоретический кафедрада старший преподаватель яз, 1986-1998-йисара СССР-дин илимрин академиядин физикадин Институтдин Дагъустандин филиалдин теоретический физикадин лабораториядин заведующий, илимдин старший къуллугъчи яз кIвалахна.
1991-йисуз Руслан Мейланова “Ферми-жидкостные эффекты в тонких металлических пленках и адсорбционных слоях” темадай Ленинграддин государственный университетда докторвилин диссертация хвена.
1999-йисалай вичин уьмуьрдин эхиримжи йикъаралди Руслан Пирметовича Дагъустандин государственный университетдин физический факультетдин теоретический физикадин кафедрадин профессор ва геотермальный месэлайрин Институтдин (ИПГ-дин) лабораториядин (Лаборатория термодинимаки геотермальных систем, лаборатории геотермомеханики) заведующий яз зегьмет чIугуна.
Россиядин илимрин академияда гзаф йисара бегьерлудаказ кIвалах авунай Руслан Мейлановаз Россиядин илимрин академиядин президентдин Гьуьрметдин грамота, 2015-йисуз “Дагъустан Республикадин илимрин лайихлу деятель” лагьай гьуьрметдин тIвар гана.
Р. Мейланова кхьей цIудралди илимдин кIвалахар, макъалаяр Россиядин ва къецепатан уьлквейрин журналриз акъатна, ам са шумуд монографиядин авторни я.
Дагъустандин государственный университетдин физический факультетдин теоретический физикадин кафедрада профессор яз кIвалахдайла Руслан Пирметовича вини дережадин пешекарар гьазурна, алай вахтунда абуру университетрани институтра, жуьреба-жуьре маса хилера агалкьунралди зегьмет чIугвазва. Абурукай яз завай чи баркаллу районэгьли, физикадинни математикадин илимрин доктор Заур Алисултанован тIварни кьаз жеда.
Мадни ихьтин са кар къейд ийиз кIанзава. Руслан Мейлановани Заур Алисултанова кхьей “Теплофизические свойства квантово-статистических систем с дробно-степенным спектором”, “Некоторые вопросы теории квантово-статистических систем, обладающих энергетическим спектором дробно-степенного типа”, “Квантовые кинетические уравнения системы “графен+размерно-квантовая пленка” ва “Некоторые особенности квантово-систематических систем с энергетическим спектором дробно-степенного типа” илимдин кIвалахар Россиядин ва къецепатан уьлквейрин илимдин журналриз акъатна, абурукай са шумудакай уьлкведин университетра преподавателри ва студентри менфят къачузва, чирзава.
“Инсанар гьамиша чан алаз амукьдач, бахтлу кас я вичин тIвар несилри рикIера хуьзвайди” — лагьанай Алишер Навоиди. Руслан Пирметович Мейланован тIвар, ада илимдин рекье къазанмишай агалкьунар несилри рикIера хуьзва. Руслан Пирметович хьтин инсанар эбеди я.
Хазран Кьасумов
