Дагъустандин здравоохраненидин министерстводин сайтда хабар ганвайвал, алай вахтунда республикада ва санлай уьлкведани коронавирус азар акатнавайбуруз яргъалди, кар кардай фидалди хабар жезвач, яни абурук азар  акатнавайди къалурзавай гьич са жуьрединни лишанар малум жезвач.

Идакай и йикъара министерствода Н.И.Пирогован тIварунихъ галай РНИМУ-дин ва Москвадин И.М.Сеченован тIварунихъ галай Сад лагьай госмедуниверситетдин пешекаррихъ галаз кьиле фейи телемедицинадин консультациядал хабар гана. Азар сагъарунал машгъул тир духтурар са фикирдал атана: къенин юкъуз абур садлагьана четин гьалдиз аватнавай азарлуйрал гзаф расалмиш жезва. Эгер са тIимил вахтар инлай вилик инсандик азар акатнавайди са жерге лишанрай аквазвайтIа, яни азар яцIа гьатдалди адахъ галаз женг чIугваз жезвайтIа, гила гьалар мадни четин хьанва. ЧIехи пай вахтара инсан азарлу яз, амма аквадай лишанар авачиз  жезва ва адакай масадбурукни  азар акатзава.

Къенин юкъуз кьилин ва важиблу месэла — азар квай кас вахтунда чирун ва ам амайбурувай чара авун, идалди азардин вилик пад кьун я.

РикIел хуьн, анжах духтурри къалурзавай меслятрал кIевелай амал авуртIа, чавай гьар садавай коронавирусдин вилик пад кьаз жеда.

Чи мухбир