Уьмуьрда тежезвай крар, инсандин кьилел текъвезвай дуьшуьшар авайди туш. Россиядин Федерациядин ва гьакI дуьньядин хейлин уьлквейрин халкьарни Советрин Союзди ва Яру Армияди фашистрин Германиядал гъалибвал къазанмишна 75 йис тамам жезвай юбилей шад гьалара, гурлудаказ, гзаф кьадарда мугьманар галаз кьиле тухуз гьазур хьанвайди тир.

Амма коронавирус лугьудай тIугъвалди вири планар терсина элкъуьрна. Вири дуьньяда малумарай карантинди Гъалибвилин сувар кIвалера тухуниз, “Рекьин тийир полкунин” гьерекат онлайн-форматда аваз тешкилуниз, куьлуь-куьлуь парадар, концертар Ватандин ЧIехи дяведин ветеранрин гьаятра тухуниз, абуруз дакIаррай, айванрикай сувар тебрик авуниз мажбур хьана. ТIугъвалди гьикьван кIеве тунатIани, Гъалибвилин сувар гьар са регионда, шегьерда, районда, хуьре, кIвале къейдна.

Дагъустан Республика ва адан халкьарни къерехда акъвазнач.

9-майдиз РД-дин Кьил Владимир Васильева РД-дин Гьукуматдин Председатель Артем Здуновахъ галаз Аскер-азадчидин мемориалдин патав гвай Даим цIун патав цуьквер эцигна­.

Махачкъала

И юкъуз са къефле инсанри Махачкъаладин Яру Армиядин аскерар (абурун арада Советрин Союздин ва Россиядин Игитарни ава) кучукнавай сурарал кьил чIугуна ва сурарал цуьквер эцигна.

Цуьквер эцигайбурун арада РД-дин Кьилин ва Гьукуматдин Администрациядин Аппаратдин руководитель Владимир Иванов, РД-дин Гьукуматдин Председателдин заместитель Рамазан Жафаров, Махачкъала шегьердин администрациядин кьил Салман Дадаев ва масубур авай.

Цуьквер эцигайдалай гуьгъуьниз Ватан патал чанар гайибур рикIел хкунин ва абуруз гьуьрмет авунин лишан яз, атайбур са декьикьада кисна акъвазна.

РикIел хкун лазим я хьи, фашистрикай хайи Ватан хуьзвай дяведа 180 агъзурдав агакьна дагъустанвийри игитвилелди иштиракна. Абурукай 80 агъзур касди женгерин майданрал чан гана. 59 кьегьалдиз Советрин Союздин Игитвилин тIвар, 7 касдиз Баркаллувилин ордендин пуд дережани гана.

Дербент

Къадим шегьерда, Гъалибвилин сувариз гьазур хьунин сергьятра аваз, Аскеррин сурар къайдадиз гъана. Лугьун лазим я хьи, виликдай телеф хьайи аскеррин сурарал тIварар кхьенвай табличкаяр алайди тушир. ТIварар сурарин кьилихъ галай къванерал кхьенвай. Вахтуни абур чир хъжедай гьалда тунвачир. Ина 911 аскер кучукнава. Гила гьар са сурун кьилихъ мармардин табличкаяр акIурнава, сурарин арайра плитка тунва, фонарар эцигнава,  туядин 40 къелем кутунва ва векьни цанва.

Дербентвийри Вирироссиядин ватанпересвилин “Гъалибвилин пайдахар”, “Дяведин элван”, “Гъалибвилин дакIарар”, “Рекьин тийир полк” акцийра иштиракна. Вузрин ва сузрин студентри шегьерда чка-чкадал, кIвалерин, дараматрин къаварал, айванрик 5 агъзур пайдах хкажна. Шегьерда авай кьван рекламадин кьуларал Ватандин ЧIехи дяведин ветеранрин шикилар алкIурна. Гьисабайла, шегьердин куьчеяр 150 ветерандин шикилри безетмишна. Абуру чи Ватандин азадвал, ас­лу туширвал, къенин ва къвезмай несилрин асайиш гележег патал душмандихъ галаз игитвилелди женгер чIугуна, гзафбуру чпин чанар къурбанд авуна ва Гъалибвал къазанмишна.

 Ахцегь

Ахцегь райондин агьалийри, федеральный каналрин “Рекьин тийир полк” гьерекатдик экечIна, Ватандин ЧIехи дяведа иштиракай чпин чIехи бубайрин, имийрин, бубайрин, далу патан фронтда еке зегьмет чIугур дидейрин, вахарин шикилар майдандиз акъудна. Райондилай къеце яшамиш жезвай ватанэгьлийриз суваррихъ галаз алакъалу видео-тебрикар ракъурна. Райондин образованидин идарайри тешкиллувилелди “Гъалибвилин дакIарар”, “Георгиевский лент” акцийра иштиракна.

Докъузпара

Усугъчайдални Гъалибвилин 75 йисаз талукьарнавай са жерге мярекатар кьиле фена. Абура райондин муниципалитетдин кьилин везифаяр вахтуналди тамамарзавай Агьмед Агьмедова, райондин собранидин председатель Абас Абасова, идарайрин, организацийрин ва жегьилрин объединенийрин векилри иштиракна.

Санитариядинни эпидемиологиядин вири шартIарал амал авуна, районда митинг кьиле тухвана, ветеранрин памятникрал, фронтда телеф хьайибурун обелискрал цуьквер эцигна. Са декьикьада кисна акъвазуналди, дяведин женгера телеф хьайибур рикIел хкана ва Ватан хуьн патал аскерри еке игитвилер къалурайди къейдна.

Муниципалитетдин чIехибуру Къалажухрин хуьряй тир районда амайни амачир са ветеран Атамов Межид Салигьовичални кьил чIугуна, адаз Гъалибвилин сувар тебрикна.

Дербент район

Суварин шадвилер онлайн-форматда аваз Дербент райондин хуьрерани, поселокрани тешкилна. Райондин администрациядин кьилин везифаяр вахтуналди тамамарзавай Фуад Шихиев кьиле аваз администрациядин хейлин векилар Ватандин ЧIехи дяведин иш­тиракчи Алимирзе Алимирзоеван уьмуьрдин юлдаш, хендеда Алимирзоева Кумсиятахъ илифна. Адав яшайишдин кIвалер маса къачудай са миллион манатдин сертификат вахкана ва Гъалибвилин суварни тебрикна. Адан гъуьл Алимирзе 19 йисавай жаван яз фронтдиз фенай. Са шумуд сеферда хирер хьана­тIа­ни, ада атлуйрин эскадронда эхирдалди душмандихъ галаз женгер чIугуна, сагъ-саламатдиз ва хурудал хейлин шабагьар алаз ватандиз хтана. Ам 2000-йисуз рагьметдиз фена.

Кьурагь

Гъалибвилин суварин вилик Кьурагь райондин администрациядин кьил Замир Азизова Вирироссиядин “Гъалибвилин дишегьлидин чин” акциядин сергьятра аваз райондин ругуд дишегьлидив  юбилейдин “1940-1945-йисарин Ватандин ЧIехи дяведа къазанмишай гъалибвилин 75 йис” медалар вахкана. Гьа са вахтунда дяведин ветерандин хендеда Гьамият Шамхалаевадиз Гъалибвилин сувар мубарак авуна ва адаз райондин администрациядин патай пулдин пишкеш гана.

Мегьарамдхуьр

Райондин муниципалитетдин кьил Фарид Агьмедова, райондин собранидин председатель Назир Алиярова, райондин кьилин заместителри ва администрациядин маса работникри Ватандин ЧIехи дяведин женгерин аскерриз ва жуьреба-жуьре тапшуругъар кьилиз акъуддайла телеф хьайи  МВД-дин къуллугъчийриз хкажнавай памятникдал цуьквер эцигна.

Райондин школьникри Гъалибвилин суваррин сергьятра аваз тухузвай ватанпересвилин вири акцийра (“Гъалибвиляй чIехи бубадиз баркалла!”, “Игитар рикIел хуьзва”, “Георгиевский лент”, “Армейский чемоданчик”) тешкиллувилелди иштиракна.

Ватанпересвилин тербия гунин кьилин макьсад сад я — акьалтзавай несилдиз Ватан, жуван халкь, хуьр, район, республика кIанарун. Гъалибчийрин несилри халкьдин игитвилел дамах авун ва бубайрин баркаллу крар рикIелай ракъур тавун…

Кьасумхуьр

Сулейман-Стальский районда Гъалибвилин суварин мярекат райондин администрациядин кьил Нариман Абдулмуталибова ва идарайрин, майишатрин, общественный организацийрин векилри Аскервилин баркалладин мемориальный комплексдал цуьквер эцигунилай гатIунна.

Къейд авун лазим я хьи, Агъа СтIалрин хуьруьн мулкуна авай мемориальный комплексдал ам авайдалайни хъсандиз туькIуьр хъувунин кIвалахарни кьиле физвай.

Суварин вилик ЦIийи Макьа “Яс чIугваз­вай диде” мемориальный комплекс эцигна, куьтягьна. Памятник гьазурайди машгьур скульптор Шариф Шагьмарданов я. Акьалтза­вай несил патал еке метлеб авай и комплекс карантин алудайдалай гуьгъуьниз ачухда­.

Гъалибвилин суварин гьуьрметдай райондин хуьрера авай вири обелискарни ремонт  авуна.

ТIугъвалди эцигиз тунвай сергьятризни килиг тавуна, райондин агьалийри, жегьилри, школьникри уьлкведа тешкилнавай ватанпересвилин хейлин акцийра хушуналди иштиракна.

Вини СтIалрин хуьре амай, Ленинграддин гьалкъадай сагъ-саламатдиз акъатай ветеран Жанна Мегьамедовадиз “Гъалибвилин волонтеррин” патай хуьруьн администрациядин кьил Селим Казимова цуьквер, пишкешар гана.

Хив

Райондин муниципалитетдин кьил Ярмет Ярметова вири агьалийриз Гъалибвилин сувар тебрикна. Администрациядин къуллугъчийри Гъалибвилин паркуна советрин аскерриз хкажнавай “Лацу дурнаяр” монументдал цуьквер эцигна. Паркуна дяведин вахтунин манияр тамамарна.

Нариман Ибрагьимов