Вири уьлкведа кьабулнавай къайдайрал амал авун яз, алай вахтунда азарханайриз COVID-19 азардикди кIевиз азарлу хьанвайбур — чпел 38,5  гра­дусдилай виниз ифин алайбур, нефес дар хьанвайбур, къурхулувал ку­тадай маса лишанар авайбур сифте­ нубатда хутахда. ИкI авуниз мажбур­ хьунин себеб виридаз малум я — къенин юкъуз азар акатнавайбур пара хьанва, азарханаяр ацIанва.

“Тади куьмекдин” бригадайри стационарриз азарлудан гьал фикирда кьуна хутахзава, компьютердин томографиядин (КТ) нетижадиз килигна — ваъ. Гьавиляй азарлуйриз лазим тир вири жуьредин ахтармишунар, гьа гьисабдай яз КТ-ни, стационарда ийизва. Кьезил жуьреда начагъ хьанвайбуру чпин сагъламвал кIвалера (амбулаторно) гуьнгуьна хутада. КТ авун патал направ­ление ахьтинбуруз духтурди (рикIиз кIан хьайивалди, ам авунин чарасузвал авач) гун лазим я. Имни дистанционно, яни гьар са касди вич яшамиш жезвай чкадин поликлиникадиз зенг авуналди кьилиз акъудиз жезва.

Амма четинвилер авачиз туш. ИкI, уьлкведа азар квани-квачни чирдай материалар авачиз хьуни ва коронавирусдин азар ахтармишзавай тестар кьиле тухузвай лабораторийрал азаб акьалтуни абурун (тестрин) нетижаяр вахтунда агакьунин кар кIеве твазва.

«Лезги газет»