Дагъустанда малар кьакьан дагъларин яйлахриз хутахунин кIвалах башламишнава. И мукьвара гьайванрик акатзавай азаррин вилик пад кьун ва абур яйлахриз хутахунин кIвалах кьиле тухузвайвал ахтармишун патал РД-дин хуьруьн майишатдин ва недай суьрсетдин министрдин заместитель Мегьамед Шапиев ва идарадин малдарвилин ва жинсинин кIвалахдин рекьяй начальникдин везифаяр тамамарзавай Юсуф Юсуфов Главсулакдин ва Аркабашдин лапагар купка ийизвай чкайриз мугьман хьана.
Къейд ийин, гьайванар купка авун абур санай масаниз тухунин кIвалах башламишдайла асул шартIарикай сад я. Купкадин кампаниядин вахтунда гьайванриз хенцIерикай, кикIламрикай ва шарарикай михьи ийидай дарманар язава.
Главсулакдин купочный ваннадин кьилин духтур Саламутин Эфендиева суьгьбет авурвал, и участокдин мумкинвилер гьар йисуз Тлярата, Гуниб, Гергебил, Акуша, Леваша ва Дагъустандин са жерге маса дагълух районрин малдарри ишлемишзава. Санлай къачурла, гатфарихъ дагъларин яйлахриз хутахдалди креолиндин къаришмадай тахминан 150 агъзур лапаг ва цIегь акъудзава. Гьа са вахтунда гьар юкъуз ваннадай тахминан 5 агъзур гьайван ракъурзава.
Мегьамед Шапиева къейд авурвал, Дагъустандин гьайванар санай масаниз тухун патал тешкилнавай шегьрейрал государстводин купкадин 8 станция гьалтзава, абурун куьмекдалди дагълариз хутахзавай вири суьруьйриз дарманар ягъуз лазим я.
“Вири станцийрал ремонтдин кIвалахар вахтунда тамамарнава, гьаниз килигна, купкадин серенжем четинвилер авачиз кьиле фин лазим я. Санлай къачурла, чи малдарри яйлахриз тахминан 1,5 миллион кьил лапагар хутахун лазим я, абурукай тахминан 10 агъзур кьил гьайван алай вахтунда рекье ава”, — гъавурда туна Мегьамед Шапиева.
Минисрдин заместителди кьилди къейд авурвал, алай йисан гатфарихъ гьайванар дагъларин яйлахриз куьчарунин кIвалах коронавирусдин инфекция чукIунихъ галаз алакъалу яз арадал атанвай акьалтIай муракаб шартIара кьиле физва. Идахъ галаз алакъалу яз, адан гафаралди, хуьруьн майишатдин хилер къуллугъчийри гьайванрин сагъламвилин хатасузвал таъминарунихъ элкъуьрнавай вири серенжемар кьабулзава. Идалайни гъейри, лапагар куьчарунин кIвалах кьиле тухунин гьакъиндай РД-дин къенепатан крарин министерстводин разивал къачунва ва и кар республикадин Гьукуматдин къарардин бинедаллаз кьилиз акъудзава.
Амина Муслимова
