Къурбандар артух жезва
Д.Хопкинсан университетдин проектдин делилрал асаслу яз, США-да коронавирусдикди кьенвайбурун кьадар 80 агъзурдалайни алатнава. Къурбандар гзафни-гзаф Америкадин Нью-Йоркда артух жезва.
COVID-19 акатнавай инсанар дуьньяда виридалайни гзаф США-да ава. И барадай алай вахтунда Россия кьвед лагьай чкадал ала. Адан гуьгъуьналлаз Испания, Великобритания ва Италия къвезва.
Малум тирвал, алай вахтунда тIугъвалди дуьньядин 187 уьлкведин инсанар къурхудик кутунва. 13-майдин делилралди, дуьньяда 4 262 799 касдик коронавирус акатнава, абурукай 291 981 кас кьенва ва 1 493 661 сагъар хъувунва. Россияда санлай 242 271 касдик коронавирус акатнава, 2212 — кьенва, 48 003 — сагъар хъувунва.
Куьгьне телефонар ахкъудда
Nokia корпорациядиз классический жуьредин кьве телефон цIийи кьилелай ахкъуддай фикир ава. Идакай машгьур инсайдер Р.Квандта вичин Twitter-аккаунтда хабар ганва.
Малум хьайивал, кьве сим-карта эцигиз жедай, кнопкаяр алай Nokia 150, Nokia 125 (TA-1235, TA-1253) моделрин телефонар муьштерийриз мукьвара тахминан 42 ва 36 евродихъ маса къачудай мумкинвал жеда. Къейдзавайвал, тIвар кьунвай телефонрин батареяр яргъалди ишлемиш ийиз жеда.
Коронавирусдиз акси яз
РАН-дин медико-биологический месэлайрин институтдин алим С. Поддубкоди малумарнавайвал, хаталуди тир коронавирусдин вилик пад кьун патал чIехи туьквенрай, базаррай къачунвай суьрсетар чпик спирт квай махсус такьатралди дезинфекция авун хъсан я. Пешекардин менфятлу теклифар “Новости” РИА-ди раижнава.
Адан гафаралди, хлор квай такьатралди михьи авуни хаталувал арадал гъун мумкин я. Пешекарди алава хъувурвал, вирусдивай 40 градусдин чимивилиз дурум гуз жезвачирвиляй, салан майваяр ва емишар кузвай цяй чуьхуьн хъсан я. Гьа са вахтунда чуьхуьн тавунвай суьрсетар холодильникда эциг тавунни теклифзава, вучиз лагьайтIа ана вирус терг тахьана яргъалди амукьун мумкин я.
Вагьшидин гьужум
Индиядин Хандвара шегьердин са кIвализ лекьен гьахьна ва ана яшамиш жезвай ирид инсандал хирер авуна. Идакай “Kashmir Life” чешмеди хабар гана.
Вагьши гьайвандин гьужумдикай хабар хьайи къуншияр гьасятда гьаятда кIватI хьана. Хизан къутармишун патал абуру тIебиат хуьнин махсус департаментдин векилриз эверна. Беденриз зарар хьайибур азарханадиз агакьарна.
Эдеб хуьн тавуртIа…
Чиновникри, госкъуллугъчийри ватандашриз эдебсузвал къалурайтIа, абуруз и кар багьаз акъвазун мумкин я. Эдебсузвал, ягьсузвал къалурунай чиновникриз жаза гунин гьакъиндай законопроект Госдумадиз теклифнава. “Газета.ru” чешмеди кхьизвайвал, талукь тир документ Думадин электронный делилрин базада раижнава.
Законопроектдин текстина къейднавайвал, эгер гьукуматдин ва муниципальный къуллугъчиди ватандашрин намусдик хкIурайтIа, ам 50 агъзур манатдилай 100 агъзур манатдал кьван кьадарда аваз пулдин жерме ва я тахьайтIа са йисан муддатда кIвалахдивай къерех ийида. Эгер ахлакьсузвал къалурунин жигьетдай вичин “алакьунар” мадни тикрар хъувуртIа, а дуьшуьшда жермедин кьадар 150 агъзурдав агакьда ва я тахьайтIа ам 2 йисан муддатда госкъуллугъдал кIвалахдай ихтияррикай магьрум жеда.
“Гишин аслан” ва Гьабиб
И йикъара UFC-дин кьил Д.Уайта малумарайвал, россияви Гьабиб Нурмегьамедованни америкави Жастин Гэтжидин арада кьиле тухудай бягьс вичелай хсуси островда тешкилиз алакьда. Адаз ихтилат физвай бягьс алай йисан гатуз тешкилиз кIанзава. Идакай “ESPN” чешмеди хабар гана.
Къейд ийин, 10-майдиз Гэтжиди америкави Тони Фергюсонан винел гъалибвал къачуна ва кьезил заланвиле UFC-дин вахтуналди тир чемпионвилин тIварцIиз лайихлу хьана. Гьунар къалурайдалай кьулухъ Гэтжиди гьасятда вичиз халисан чемпиондин чIул къазанмишун патал Нурмегьамедовахъ галаз бягьс кьиле тухуз кIанзавайдакай лагьана. Турнирдилай кьулухъ халисан чемпион тир Гьабиба Гэтжи гишин асландив гекъигна ва вич адахъ галаз бягьс кьиле тухуз гьазур тирди малумарна.
Хъиткьинарна
“Новости” РИА-ди 13-майдиз хабар гайивал, Афгъанистандин меркезда террористди азарханадал гьужум авуникди кьейибурун кьадар 24 касдив агакьнава. Идан гьакъиндай “1TV” каналди малумарна. Эвелдай 13 кас кьенвайдакай ва 15 касдиз зарар хьанвайдакай хабар ганай.
Къейдзавайвал, террорист-смертникди Кабул шегьердин азарханадиз гьахьдай сивел хъиткьинар арадал гъана ва адалай кьулухъ дараматдиз боевикар гьахьна. Медицинадин къуллугъчийрикай анжах са паюнивай анай вахтунда экъечIиз хьана. Гуьгъуьнлай вири гьужумчияр хатасузвилин къуватри тергна.
Гьазурайди — К.Ферзалиев
