Юкьван ва Кьиблепатан Африкадин гьайванрин алемда ленивец тIвар алай ажайиб вагьши яшамиш жезва. Ам тамамдаказ сарар авачир, нек хъвадай гьайванрин жергедик акатзава.  Малум тирвал, ленивецриз юзунар, гьерекатар эсиллагь кIандач, идалайни гъейри, абур суткадин къене 10-15 сятда ксузва. Адал акьалтнавай тIварни кагьулвилихъ, темпелвилихъ галаз алакъалу я.

И темпел гьайванар кьилди-кьилди яшамиш жеда, амма сад садал ацалтай дуьшуьшра абуру чпин арада дуствал авайди къалурда. Юкьван гьалдин кицIин хьтин беден авай и гьайванрал къацу тав квай яргъи ва векъи чIарар жеда. Адан кьил гъвечIиди, тIиш кьулу ва куьруьди я. Бедендин заланвал 5-далай 9 килограммдив кьван агакьзава, яргъивал зур метрдилай са тIимил артух жеда.

ТIуьнин еринда абуру тарарин пешерикай хийир къачузва. Бязи дуьшуьшра абуру гьашаратарни,  лап гъвечIи чурчуларни неда. Чпин уьмуьрдин чIехи пай абуру, саки юзанни тийиз, тарарал акъудзава. Гьафтеда садра абур тарарай чилел эвичIда. ТIебиатда абурун уьмуьрдин яргъивал 10-20 йисаз барабар жеда.

«Лезги газет»