Алиханов Абдул-Вагьаб Сефибегович 1904-йисуз Ахцегьа къуллугъчидин хизанда дидедиз хьана. Фамилия Дагъларов тир ада гуьгъуьнай вичин пара кIани чIехи буба Алиханан тIвар фамилия яз къачуна.
Ахцегьрин машгьур школа тарифлудаказ куьтягьай гада хъсандиз имтигьанар вахкуналди Ленинграддин мединститутдик экечIна. Анаг агалкьунралди акьалтIарай жегьил пешекардиз вуздин ректоратди Ленинградда дяведин медицинадин С.М.Кирован тIварунихъ галай РККА-дин академиядик экечIун теклифда. Абдул-Вагьаба 1935-йисан ноябрдиз анагни агалкьунралди куьтягьна, адакай вини дережадин духтур хьана. Къейд ийин, а макъамда ам РККА-дин медакадемия куьтягьай сад лагьай дагъустанви тир.
Ватандин ЧIехи дяве башламишай сифте йикъалай хирург Абдул-Вагьаб Алиханов (а чIавуз медицинадин офицер Киев шегьердин патав гвай дяведин чIехи аэродромдин хсуси къурулушдин — аскерриз къуллугъзавай санслужбадин полкунин начальник тир) фронтда хьана. Украинадин 1-фронтдин къурулушдик кваз Сталинграддин, Курскдин дугадин ва маса вакъиайрин къати женгера иштиракунай “Яру гъед” ордендиз, “Жуьрэтлувиляй” медалдиз ва са жерге маса шабагьриз лайихлу хьана.
Сталинграддин патав дагъви хирургди чуьлдин четин шартIара (псис лампадин экуьналди, лазим алатар ва хер кутIундай материаларни авачиз) фронтдин командующий, армиядин генерал В.И.Чуйков операция авуна. Генерал къутармишна, ам вахтунда кIвачел ахкьалдарунай хирург Алихановаз Кремлда М.И.Калинина гьукуматдин шабагь гана.
1944-йисуз Абдул-Вагьаб Сефибегович Москвадиз, ВВС-дин санитарный кьилин Управленидин къуллугъдал хкана. Чандин сагъсузвилиз килигна, 1947-йисуз ам отставкадиз экъечIна. Дагъустандиз хтай пешекар Буйнакск шегьердин здравоохраненидин отделдин ва сад хъувурдалай кьулухъ гьакI Буйнакск райондин здравотделдин заведующийвиле тайинарна. Яшлу кьилихъ ада Дагконсервтрестдин санитарный духтурвиле кIвалахна.
Тежрибалу пешекардин чешнелу кIвалах Дагобкомди, РСФСР-дин суьрсетдин промышленностдин министерстводи (министерстводи тIвар алай къизилдин сятни гана) ва Буйнакск шегьердин руководстводи са шумудра гьуьрметдин грамотайралдини кьиметлу пишкешралди къейдна.
Абдул-Вагьаб духтур 1976-йисуз кечмиш хьана, Буйнакск шегьердин сурара кучукнава. Аллагьди вичиз рагьметар гурай!
Дашдемир Шерифалиев
