Абумислимов Гьамид 1914-йисуз Хиврин хуьре урта лежбердин хизанда дидедиз хьана. Инсафсуз Гитлеран фашистри чи уьлкведал хабарсуз вегьейла, Гь.Абумуслимова Кирован тIварунихъ галай колхозда лежбер яз кIвалахзавай.
Гзафбурухъ галаз амни Ватан душмандикай хуьн патал фронтдиз фена. Дирибаш дагъвиди 736-лишанчийрин полкуна вичин гьунарар къалурна ва вишералди душманар тергна. Ада Кавказ, Волга, Украина, Молдавия, Белоруссия хуьн ва азад авун патал хьайи къати женгера иштиракна.
1945-йисан гатфариз фашистрикай Европадин уьлквеяр азад ийидайла, Польшада адал залан хер хьана. Душмандин пулеметдин гуьлледи адан кIвач галудна.
Абумислимов Гьамид госпиталда сагъар хъувурдалай гуьгъуьниз 2-группадин набут яз Хивдиз хтана. Адан хурудилай Ватандин ЧIехи дяведин I дережадин, Яру Гъед, Сталинан… орденри, медалри нур гузвай.
Набут тиртIани, Абумислимов Гьамида хуьре, районда жуьреба-жуьре идарайра кIвалахна. Адан гьунарлу уьмуьрдин рехъ вирибуруз чешне хьана. Абумислимов Гьамидан тIвар Хиврин хуьруьн са куьчедиз ганва.
Рамазан Велибегов
