Майдиз жедай дегишвилер
Россияда са жерге дегишвилер майдин вацра кардик акатда. “REGNUM” чешмедин делилралди, уьлкведин экономикадин хиле жезвай дегишвилерикай сад физический ксари банкарай пул ракъурдайла, кьазвай комиссиядин такьатрин вини кьадардал сергьят эцигунихъ галаз алакъалуди я.
Хабар гузвайвал, 100 агъзур манатдал кьван кьадарда авай пул россиявийривай пулсуздаказ ракъуриз жеда. Ракъурзавай такьатрин кьадар адалай артух хьайитIа, комиссия 0,5 процентдикай ибарат жеда, амма комиссиядин кьадар 1500 манатдилай артух жедач, яни комиссиядин лап вини кьадар и рекъемдал сергьятламиш жеда.
Россиядай нафт тухуниз талукь пошлинадин кьадарни тIимил жедайвал я.
РФ-дин оборонадин министерстводин пешекарвилин образованидин идарайра тарсар гунин кIвалах вахтунилай фад акьалтIарда, яни майдин вацра идарайра чирвилер гудач. Коронавирус чукIунин вилик пад кьунин макьсаддалди, и гьакъиндай къарар кьабулайди РФ-дин оборонадин министр С.Шойгу я.
Маскаяр — йисан эхирдалди
Къазахстандин гьукумдарри элликлух чкайра чинрал маскаяр алаз къекъуьнин къайда 2020-йисан эхирдалди къуватдай вегьин тавунин къарар кьабулнава. “NUR.KZ” чешмеди хабар гузвайвал, идакай а уьлкведин кьилин духтур А.Есмагамбетова ихтилатна.
Адан гафаралди, ватандашар коронавирусдихъ галаз вердиш хьун лазим я. “Коронавирус сезондин уьзуьрдиз элкъведа”, — тагькимарна пешекарди.
Минздравдин пешекарди инсанри маскаяр кIеви чкайра-дараматра, аптекайра, туьквенра ва жемиятдин улакьра алукIун герек тирди лугьузва.
WhatsApp-дин цIийи мумкинвал
Инсанри гегьеншдиз менфят къачузвай WhatsApp мессенджерда цIийивал кардик акатнава. Компаниядин пешекарри малумарнавайвал, гила кIватIалралди тешкилзавай видеодин ва аудиодин зенгера 8 касдивай санал иштиракиз жеда. Икьван чIавалди лагьайтIа, видеодинни аудиодин зенгер са вахтунда анжах кьуд касдин иштираквал аваз тешкилиз жезвай.
Къейдзавайвал, коронавирус себеб яз кьабулнавай карантиндин тедбиррихъ галаз алакъалу яз вири дуьньядин инсанри мессенджердикай икьван чIавалди садрани тахьай жуьреда гзаф менфят къачузва. Эхиримжи вахтара иллаки са шумуд касдин иштираквал авай зенгер тешкилзава, гьавиляй иштиракчийрин кьадар кьве сеферда артухардай къарар кьабулна. Пешекарри алава хъийизвайвал, цIийи жуьредин мумкинвиликай хийир къачун патал талукь приложение цIийи хъувун чарасуз я.
Августдиз хъсан жеда
Сингапурдин технологийринни дизайндин университетдин пешекарри тестикьарнавай делилрал асаслу яз, Россияда коронавирусдин тIугъвал тамамвилелди августдин вацра куьтягь жеда.
Алимрин гьисабдалди, Россияда коронавирусдикди начагъ хьунин къизгъин гьалар 27-апрелдиз кукIушдив агакьна. Къейд ийин хьи, идалай вилик пешекарри июлдин эхирра хьиз чи уьлкведа тIугъвал амукьдач лагьанай.
Гьихьтин машинар гзаф чуьнуьхзава?
2019-йисан нетижайрал асаслу яз, Россияда виридалайни гзаф Cadillac Escalade маркадин автомобиль чуьнуьхзава. “Лента.ру” чешмеди хабар гузвайвал, ихьтин делилар “АльфаСтрахование” тешкилатди раижнава.
Чарадан улакьар гьална чуьнуьхзавайбурун арада Toyota маркани машгьур я. Гзафни-гзаф чуьнуьхзавай улакьрин сиягьда кьвед лагьай чкадал Toyota Camry ала, пуд лагьай чкадал — Toyota Land Cruiser, кьуд лагьай чкадал — Toyota Land Cruiser Prado. Абурун гуьгъуьнал Land Rover Freelander, Lexus LX, Mitsubishi ASX, Ford Focus, BMW 5-series, KIA Ceed автомобилар ала.
Статистикадал асаслу яз, улакьрин угърийри йифен береда гзафни-гзаф инсанар яшамиш жезвай кIвалерин патаривай машинар чуьнуьхзава, йикъан береда — алишверишдин маканрин мукьув акъвазарнавай чкайрилай.
Маскаяр туькIуьрдай материал
Америкадин алимри кIвалин шартIара медицинадин маскаяр цвадай виридалайни хъсан парча тайинарнава. Ахтармишунрин нетижаяр “ACS Publications” сайтда раижнава.
Аргоннский милли лабораториядин пешекарри халкьдин арада гегьеншдиз ишлемишзавай халисан ва синтетикадин материалрал махсус ахтармишунар тухвана. Нетижада абуру кьве материал какадарна туькIуьрнавай парчайрикай (памбаг-шифон, памбаг-фланель) гьазурнавай маскаяр виридалайни хъсанбур тирди тестикьарна.
«Лезги газет»
