Ватандин ЧIехи дяведин йисара Курхуьрелай 200-далай виниз инсанар фронтдиз фена. Бязи хизанрай кьвед, пуд, адалайни гзаф ксар Ватан душмандикай хуьн патал рекье гьатнай. Ахьтин хизанар хуьре къадав агакьнава.
Гьажиев Файзулагьан хизандайни пуд кас — Мегьамед, Сиражудин ва Шагьабудин армиядин жергейриз тухвана.
Шагьабудина дяведин эвел кьилелай душмандихъ галаз кьиле фейи къати женгера иштиракна. Жергедин аскер яз, ада са шумуд женгина викIегьвал къалурна. Гьайиф хьи, 1942-йисан майдиз са женгина ам гел галачиз квахьайдакай кIвализ хабар агакьнай.
Сиражудинал женгерикай сана залан хер хьана, 3-группадин инвалид яз кIвализ хтана. Ада хуьре яргъалди сифтегьан классрин муаллим яз зегьмет чIугуна. Сиражудиназ “За боевые заслуги” медаль гана, адахъ юбилейрин медаларни ава.
Муькуь стха Мегьамедни дяве башламишай сифте йикъарилай женгерик экечIна. Сад-садан гуьгъуьналлаз ада Моздокдин, Воронеждин патарив кьиле фейи женгера викIегьвилер къалурна. Старший сержант тир ада Сталинград патал кьиле фейи женгера мадни викIегьдиз иштиракна. Ина адан кIвачел лап залан хер хьана. Ам госпиталда яргъалди къаткуниз мажбур хьана. 1-группадин инвалид яз старший сержант Гьажиев Мегьамед хизандин патав хуьруьз рахкурна.
Мегьамед Гьажиеваз “Ватандин ЧIехи дяведин” орден, “Сталинград хуьнай”, “Германиядал гъалиб хьунай”, “Дирибашвиляйни жуьрэтлувиляй” ва маса медалар гана. Абур хизанди багьа ядигарар яз хуьзва.
Райсудин Набиев,
зегьметдин ветеран
