Виринра хьиз, алай вахтунда къадим Дербентдани коронавирусдин тIугъвалдиз акси яз сада-садаз куьмек гунин ва мергьяматлувилин серенжемар давам хъжезва. Шегьердин КЦСОН-дин къуллугъчийри яшар гзаф хьанвай, чпихъ яшайишдин жигьетдай лазим тир вири мумкинвилер ва шартIар авачир ксарихъ, хизанрихъ галаз сих алакъа хуьзва. КIвалериз физ, абуруз недай-хъвадай суьрсет, герек авайбуруз аптекайрай дарманар маса къачузва, гьакI амай игьтияжарни тамамарзава.
Коронавирусди басрух гузвай и йикъара шегьерда мергьяматлувилин мярекатар шегьердин администрацияди, чIехи карханайрин коллективри, карчийри тешкилзава. Алай вахтунда кIеве авай ксариз: ветеранриз, набутриз ва къазанжияр тIимил къвезвай хизанриз куьмекар гузва. Шегьердин администрациядин культурадин, жегьилрин политикадин ва спортдин рекьяй управлениди, волонтерри, медколледждин студентри са куьруь вахтунда чарасуздаказ кIвалера амукьнавай ксарив суьрсетдин 300-далайни гзаф наборар (дуьгуь, шекер, гречка, чIем, гъуьр, чIахар ва маса шейэр) агакьарнава ва и мергьяматлу кIвалах давамарзава.
Чпин мажибар тIимил тир ва алай четин вахтундани шегьер аваданламишунин, михьиз хуьнин, куьчеяр ва паркар къацу авунин, анра тарар цунин кIвалахар давамарзавай “Горзеленхоз”, “Дербентсервис” ва са жерге маса тешкилатра зегьмет чIугвазвай ксаривни суьрсетдин наборар агакьарнава. И барадай волонтерриз шегьердин автотранспортдин карханайри чпин патай машинар чара авунва.
Шегьердин волонтерри, кьилин ва юкьван образованидин идарайрин студентри алай вахтунда чпи кьиле тухузвай мергьяматлувилин серенжемар ЧIехи Гъалибвилин 75 йисан юбилейдизни бахшнава.
Нариман Къарибов
