Играми газет кIелзавайбур! Алай йисан эвел кьилера чна Рамазандин вацра мусурманрин диндиз талукьарнавай конкурс тухудайдакай хабар ганай. Шукур хьурай Аллагьдиз чаз ихьтин мумкинвал гайи.
Лагьана кIанда, конкурс тухунин куьмекдалди чаз газет кIелзавайбурухъ диндин рекьяй авай чирвилер артухардай, инсаният патал Исламдихъ авай метлеб, кьетIенвал къалурдай, кIелзавайбурун арадай диндин дерин чирвилер авайбурун алакьунар къейддай ниятар ава.
Конкурсдин кьилин шартIарикай сад ам я хьи, ана Исламдин университетар, медресаяр акьалтIарнавай, кьилдин алимривай, имамривай чирвилер къачунвайбуруз иштиракдай ихтиярар авач. Вучиз лагьайтIа, абур хъсандиз диндин гъавурда ава ва конкурсдин суалриз абурувай са четинвални авачиз жавабар гуз жеда. И конкурс, асул гьисабдай, жемят, адетдин газет кIелзавайбур (чпихъ Исламдай имамрихъ, муаллимрихъ, алимрихъ хьтин чирвилер авачирбур) патал я. Яшарин жигьетдай тайин сергьятар авач, конкурсда жегьилривайни иштиракиз жеда, яшлубурувайни.
Конкурсдин суалриз жавабар гун патал 2 гьафте вахт тайинарзава, 15-майдалди. Анлай кьулухъ жавабар кьабул хъийидач. Иштиракчийривай чпин жавабар редакциядиз пуд жуьредикай менфят къачуна ракъуриз жеда:
1) почтадин алакъадин отделенийрай (РД, Махачкала, пр-т Насрутдинова, 1 “А”, 7-этаж);
2) интернетдин куьмекдалди чи газетдин электронный почтадиз (адрес — Lezgigazet@yandex.ru);
3) ватцапдиз (телефондин нумра — 8989-653-42-35) рекье тваз жеда.
Гьим къулай ятIа, гьам хкягъа. Жабавар аваз рекье твазвай чарчин сифте кьиляй “Конкурсдиз” гаф кхьиз рикIелай алудмир.
Гъалибчияр пуд кас хкяда. КIвенкIвечи чкаяр кьурбуруз савкьатар гуда: 1-чка — телефон, 3 агъзур манат; 2-чка — сят, 2 агъзур манат; 3-чка -капI ийидай халича, 1 агъзур манат пул. Идалай гъейри, абуруз лезги чIалал Пайгъамбардин (къуй Аллагьдин патай салават ва саламар хьурай вичиз) уьмуьрдикай кхьенвай ктабар, дипломар ва Замзамдин яд гуда.
Иштиракчияр патал мад са шартI ава: редакциядиз жавабар рекье твадайла, тIварни фамилия, яшамиш жезвай чка (шегьер, район, хуьр) ва телефондин нумра къалурун чарасуз я.
Конкурсдин нетижаяр Рамазандин варз куьтягь хьайидалай кьулухъ кьада ва гъалибчийрин тIварар газетдай малумарда. Алай вахтунда Дагъустанда коронавирус тIугъвалдихъ галаз алакъалу яз авай гьалар фикирда кьуна, гъалибчийрив савкьатар са тIимил геж (гьалар секин хьайила) вахкуда. Абур вахчун патал мус ва гьиниз атун лазим ятIа, чна гъалибчийриз телефондиз зенг авуна хабар гуда.
Конкурс 10 суалдикай ибарат я. Къейд ийин хьи, абур 2019-йисан сентябрдилай инихъ “Лезги газетдин” чинриз акъатнавай диндин макъалайрикай даях кьуна гьазурнава.
Суалар:
- Жабраил малаикдилай атанвай Пайгъамбардин (къуй Аллагьдин патай салават ва саламар хьурай вичиз) гьадисда къалурнавайвал, Ислам вуч я ва иман вуч я?
- Тубадин шартIар гьибур я?
З. Аллагь Таалади чун инсанар яз вуч патал халкьнава ва адан делил вуч я?
- Шариатдин илим чируниз гзаф лайихлувилер ава. И кар тестикьарзавай са аят ва я са гьадис гъваш.
- Къуръан вуч я (адан тариф, определение), ада шумуд сура, жуз ава ва сифте атай аят гьим я?
- Пайгъамбардин (къуй Аллагьдин патай салават ва саламар хьурай вичиз) гьадис вуч я (тариф, определение), Пайгъамбар (къуй Аллагьдин патай салават ва саламар хьурай вичиз) гьина хана ва гьина кучукнава? Адан диде-бубадин тIварар лагь.
- Истихара-дуьа вуч я?
- Исламда хъсан эдебрихъ ва ахлакьрихъ еке метлеб ава. И кар тестикьарзавай кьве делил (са аят ва са гьадис) гъваш.
- Диде-бубадин чIалаз килигун эмирзавай са делил (аят) гъваш.
- Рамазан вацран кьетIенвал вуч я? И вацраз Къуръандихъ галаз гьихьтин алакъа ава ва Лайлату-ль-Къадри вуч я?
«Лезги газет»
