11-майдалди
Чи уьлкведа кIвалах тийидай йикъар 11-майдалди давам жеда. “Lenta.ru” сайтди хабар гузвайвал, идакай Россиядин Президент В.Путина 28-апрелдиз регионрин кьилерихъ галаз онлайн-совещание кьиле тухудайла малумарна.
РикIел хкайвал, майдин суварин арада авай 6, 7 ва 8-майдин йикъар кIвалахдайбур я, амма коронавирус чукIунин гьалар явашарунин макьсаддалди цIи и йикъарни уьлкведин регьберди ял ядайбур яз малумарна.
29-апрелдин делилралди, дуьньяда коронавирус акатнавайбурун кьадар 3 125 267-дав агакьнава, абурукай 934 762 кас сагъар хъувунва, 217 363 — кьенва. Чи уьлкведа коронавирусди 99399 кас начагъарнава, абурукай 10 286 сагъар хъувунва ва 972 кас кьенва.
Хийирлувал тайинарна
Швециядин Гетеборгский университетдин алимри хъвадай къагьве (кофе) гьазурунин менфятлу къайда тайинарнава. Къейдзавайвал, куьзнавай къагьве виридалайни хатасузди ва уьмуьр яргъи ийидайди я. Пешекаррин фикирдалди, ада рикIинни дамаррин азаррин тевекул тIимиларда. Алимри макъала “European JournaI of Preventive CardioIogy” журналда чапнава.
Ахтармишунра 20-79 йисарин яшда авай 508747 итимдини дишегьлиди чпин гуьгьуьллувилелди иштиракна. Нетижада малум хьайивал, куьзнавай къагьве хъвазвайбурун уьмуьр ам эсиллагь хъван тийизвайбурундалай са кьадар яргъи жезва.
Хаталу гаджетар
Эгер карантиндин муддатда гаджетар гваз вахт гзаф кечирмишайтIа, инсандин вилерин экв зайиф хьун мумкин я. Идакай Ростовдин областдин минздравдин духтур А. Ушникова “Россиядин газетдиз” интервью гудайла суьгьбетна.
Ада къейд авурвал, карантиндин вахтунда инсанри гзафни-гзаф телевизордин, компьютердин кIане ва я гъилера смартфонар аваз вахт акъудзава. Эгер и кар датIана ва фагьумсузвилелди давамариз хьайитIа, пешекардин фикирдалди, инсандин вилерин экв ерли квахьунни мумкин я. Адан гафаралди, вилер зайиф хьунин тевекулдик гзафни-гзаф смартфонри кутазва. Хаталувилин жигьетдай кьвед лагьай чкадал планшетар ала. Компьютердихъ ацукьна кIвалахзавайбурузни пешекарди мукьвал-мукьвал 30 декьикьада кьван ял ягъун теклифзава.
Куьмек тIалабнава
“Новости” РИА-ди хабар гузвайвал, Россиядивай мад 13 уьлкведи коронавирусдихъ галаз женг чIугунин карда куьмек гун тIалабнава.
Алай вахтунда Россиядин талукь тир ведомствойри Йеменди, Алжирди, Египетди, Катарди, Кувейтди, Ливанди, Ливияди, Мавританияди, Мароккоди, Палестинри, Сирияди, Суданди ва Тунисди авунвай тавакъудихъ галаз алакъалу месэла веревирдзава.
Идалай вилик Россияди Италиядин хейлин регионриз куьмек ганай. Италиядин агьалийри Россиядилай гзаф разивал ийизва.
Туьркиядин гьужум
Туьркиядин кьушунри Сириядин Идлиб вилаятдин Найраб хуьруьн патав боевикрин терефрал гьужумна. Идакай “Известия” чешмеди хабар гузва.
Чешмедин делилралди, террористрин кIеретIрин терефриз авиациядин ягъунарни кьуна. Къейдзавайвал, ягъунар кьиле фейи вахтунда яракьлу боевикри туьркерин бронетехникадихъ цIай ахъайна. Аскерри сифтедай вилерай накъвар гъидай газ ахъайна, гуьгъуьнлай абур гуьлле гунив эгечIна.
Къейд ийин, 5-мартдиз Москвада кьиле фейи рахунрин нетижада Россиядинни Туьркиядин президентар Идлибдин сергьятра ягъунар акъвазарунин гьакъиндай икьрар хьанай.
Чими гад ва цIайлахар
ЦIинин гад тарихда хьайи лап чими 5 гатун жергеда гьатун мумкин я. РФ-дин тIебиатдин ресурсрин ва экологиядин министр Д.Кобылкина къейд авурвал, ихьтин малуматар виликамаз Росгидрометди ва къецепатан гидрометеорологиядин станцийри раижнава.
Регионра цIайлахар (пожар) ва селлер арадал атунихъ галаз алакъалу месэлайрин гьакъиндай Россиядин Президент В.Путинахъ галаз кьиле фейи совещанидал Д. Кобылкина малумарайвал, алай йисан гатфариз РФ-дин тамара арадал атай цIайлахрин чIехи пай дуьшуьшар коронавирус себеб яз кардик кутунвай сергьятламишнавай къайдайрихъ ва гьавадин шартIар чими хьунихъ галаз алакъалу я.
Авиалесоохранадин делилралди, алай вахтунда чи уьлкведа 100-далайни гзаф тамар кузва.
Кесибрин гъил кьуна
И йикъара Индиядин актер Аамир Хана кесибар патал 1 килограмм гъуьр чара авуна. Гьар инсандал анжах са килограмм гъуьр гьалтзава лагьайла, гзафбуруз ам тIимил яз акуна ва вахчуз фенач. Амма гьакъикъатдани яшайишдин дарвиле авай, кIвале недай затI авачир ксари чеб патал гьа са килограмм гъуьрни багьа савкьат тирди аннамишна. Гуьгъуьнлай малум хьайивал, мергьяматлу актерди садакьа кьабулай вири ксарин пакетра гъуьруьхъ галаз 15 агъзур рупийдин кьадарда (14500 манат) пулни тунвай.
«ЛГ»
