Дагъустанда коронавирус акатнавайбурун кьадар йикъалай-къуз артух жезва. ТIугъвал акатнавайбурун кьадардал гьалтайла, чи республика Урусатдин регионрин арада вад лагьай чкадал ала. Коронавирус акатнавайбур виридалайни гзаф Москвада ава. Адалай кьулухъ — Москвадин областда, Санкт-Петербургда, Нижегородский областда.
РД-дин Роспотребнадзордин делилралди, 29-апрелдиз Дагъустанда коронавирус акатнавайбурун кьадар 1231-дав агакьнава. Гьа са вахтунда духтуррилай начагъ хьанвай 88 кас сагъар хъийиз алакьнава. Санлай къачурла, республикада 17983 кас ахтармишнава. 2629 кас лагьайтIа, карантиндал ала. Коронавирусди республикада 12 кас кьенва.
ТIугъвалдихъ галаз алакъалу гьалар къвердавай къизгъин жезвайди фикирда кьуна, республикада карантин давам жезва. Шегьеррин ва хуьрерин агьалийриз игьтияж авачиз кIвалерай экъечIун къадагъа авунва. КIваляй Президентдин Указдал асаслу яз кIвалахзавай къуллугърин векилриз (махсус пропускдин куьмекдалди кIвалахал фин патал), недай суьрсет, дарманар маса къачуз, зирзирбил, амукьаяр гадариз ва кIвалин гьайванар сейрдиз акъудиз экъечIдай ихтияр ава.
Духтурри, Роспотребнадзордин Управленидин пешекарри дагъустанвийриз хсуси гигиенадин, тайинарнавай къайдайрал амал авуниз эвер гузва.
Играми газет кIелзавайбур! Ша чна чи сагъламвал хаталувилик кутан тийин. Духтурри къалурзавай меслятрал амал авунихъ еке метлеб авайди рикIелай алудмир!
Чи мухбир
