Чи ватанэгьлияр — гьар сана

Москвада яшамиш жезвай, вичин алакьунринни чирвилерин куьмекдалди вини дережайриз хкаж хьанвай лайихлу ва чешнелу  ватанэгьлийрикай сад юрист, адвокат, машгьур вуздин педагог  Герман  Физамедович  Идаятов  я.

Ам Бакуда 1962-йисуз дидедиз хьана. Адан диде Докъузпара райондин куьгьне Филерин хуьряй я. Ватандин ЧIехи дяве куьтягь хьайидалай кьулухъ гзаф хуьруьнвияр дагълух ватандай экъечIна. Германан диде несибди Бакудиз акъудна. Адан бубадин ери-бине Азербайжан республикадин КцIар райондай я.

Дидеди Герман гъвечIи чIава­лай ктабрал, музыкадал рикI алаз вердишарна, бубади техника, чи халкьдин тарих, меденият кIанар­дай гьиссер кутуна. Хъсан тербиядик кваз чIехи хьайи гадади мектеб­ куьтягьайдалай кьулухъ СССР-дин яракьлу жергейра къуллугъ авун кьетIна. ИкI, адаз Москвадин ок­ругдин ПВО-да къуллугъдай кьисмет хьана. Ватандин вилик бур­жи кьилиз акъудайдалай кьулухъ, меркез бегенмиш хьайи жегьилдиз анай масанихъ хъфиз кIан хьанач. Ина яшамишни жез, зегьметни чIугваз кIан хьайи Герма­на сифте нубатда образование къа­чунин къаст вилик эцигна. 2000-йи­суз ада “бухгалтервилин учет ва аудит” пешедай Москвада кардик квай К.Тимирязеван тIварунихъ галай хуьруьн майишатдин академиядин экономикадин факультет куьтягьна.

Гуьгъуьнлай кьвед лагьай кьилин образование къачуна — “гражданский право” пешедай финансринни юридический академия куьтягьна. И пешедай ада финансрин ва коммерциядин хейлин карханайра, къурулушра кIвалахна, вичин тежриба хкажна. 2007-йисуз ада адвокатвилин дережа къачун патал Москвадин областдин адвокатрин палатадин комиссиядин вилик агалкьунралди махсус имтигьанар вахкана.

Далудихъ халуяр ва я чир­хчирар галачиз, Герман Физаме­довича вилик эцигай макьсадар анжах вичин чIехи зегьметдалдини алакьунралди нетижайрив агакьарна.

Чирвилерин дережа са шумуд хиляй артухарунин гьерекатар винидихъ къейднавайбурал акъвазнач. Юридический рекьяй вичихъ хъсан чирвилер ва кIвалахдин мукьуф  авай пешекарди МГУ-да педагогикадин факультетни куьтягьна ва Москвадин са жерге вузра юридический рекьяй студентриз тарсар гуз эгечIна.

Пешекардихъ «Правовые проблемы регулирования муниципального самоуправления в республике Дагестан» темадай диссертация хуьдай ва юридический илимрин кандидатвилин дережа къачудай ниятни ава. Илимдин рекьелди ах­тармишун патал хкянавай темадихъ ада чкадин гьукум арадал ату­нин ва вилик финин жигьетдай еке метлеб аваз гьисабзава.

Къейд ийин, 2018-йисуз Г.Идаятов “Москвадин областдин ад­вокатрин палатадин сейли адвокат” тIварцIиз лайихлу хьана. Адаз  зегьметкешвал, къастунал кIеви­вал, регьимлувал хас я. Са шакни алачиз, хьанвай агалкьунарни ихьтин ерийрин, гьакъисагъ зегьметдин нетижа я лугьуз жеда. Къуй адахъ сагъвал ва фикирдик квай крар кьилиз акъуддай мумкинвилерни хьурай!

К. Ферзалиев