Шикилдай аквазвайди аламатдин жуьредин акунар, кIалуб авай гьайван я. Молох тIвар алай и гъвечIи чурчул агамайрин жинсиник акатзава. Руфун галчIуриз фидай и жуьредин гьайванрикай молох сифте нубатда адан бедендал алай цацаралди тафаватлу жезва. Австралиядин къумлух чкайра яшамиш жезвай молохдин тIуьн цекверикай ибарат я. Цеквер лагьайтIа, чурчулар яшамиш жезвай къумлухра булдалди ава. Молохди ацукьай чкадал декьикьайрин къене вишералди цеквер неда. Гьа икI, са юкъуз ада са шумуд агъзур цегв незва.
Мадни са кьетIенвал ам я хьи, гьавадин чимивилиз килигна, адавай вичин ранг дегишариз жезва. Асул гьисабдай абур макъу ва хъипи, ярувални макъувал квайбур жеда.
Чурчулдин цацар гъвечIи крчариз ухшарбур я. Гьа цацар себеб я адаз маса гьайванривай зиян гуз жезвач. Абурун бедендин яргъивилел 22 сантиметр кьван хьун мумкин я. Чурчулри чпиз хъуьтуьл чкайра тIеквенар эгъуьнзава. Са гьихьтин ятIани хаталувал малум хьайила, молохди вичин кьил къумадик кутада, и жуьреда, зиянкар вагьшийрин фикир халисан кьиливай масанихъ алудуналди, адан кьулухъ пад “тапан кьилин” ролда къугъвада. ТIебиатда абурун душманар вагьши къушар ва варанар (еке чурчул) яз гьисабзава.
«Лезги газет»
