— Вирт хуькуьрнавай дарчинар яш хьанвай инсанар патал гзаф хийирлу я: бедендиз къуват гъида, рикI мягькемарда, нефес хъсанарда.
— Эгер инсан 15 декьикьада шехьайтIа, йисан къене бедендал акьалтнавай заланвал алатда.
— Яшар хьанвай инсанар патал хурмадин кьурурнавай пешерин чай гзаф хийирлу я.
— Гьар юкъуз са истиканда авай помидоррин миже ишлемишайтIа, иви кьери ва гьакIни инсульт хьунин хаталувал тIимил жеда.
— МетIен кIвалакIра яд акъвазнавайла, келемдин пешинивай кьелечIдиз вирт гуьцIна, метIел эцигна, кутIунда. Пеш кьурадалди тада. Ихьтин процедуради хъсан нетижа гуда.
— Нефесдин органрин азарар (бронхит) авайла, са истиканда авай некIедиз куьлуьз куьткуьннавай чичIек вегьена, 15 декьикьада хуькуьриз-хуькуьриз, ргада. Ахпа ам чимизмаз са йикъан вахтунда тIимил-тIимил хъвада. Ихьтин процедура 2-3 юкъуз кьиле тухвайтIа, уьгьуьдин гелни амукьдач.
— Яргъал вахтунда дамарра ивидин гьерекат къайдадик хьун патал агъадихъ галай рецептдикай менфят къачуда.
Катулдиз хуьрекдин 5 тIуруна авай нарат тарцин пешер, хуьрекдин 2 тIуруна авай жикIияр ва гьакьванни чичIекдин хъуьруьшар вегьена, винелай са литр къайи яд илична, зайиф цIал эцигна, 10 декьикьада ргана, са тIимил вахтунда тада. Ахпа ам куьзна, дуьм-дуьз са литр хьун патал са тIимил яд хъияда. Гьалима са шумуд паюниз пайна, 2 йикъан вахтунда хъвада. Куьтягь хьайила, ам цIийи кьилелай гьазур хъийида. Курс 4 варз я. Сагъламвал патал хийир хьанвайди са гьафтедилай гьиссда. Мадни ихьтин гьалимади ратар, чIулав лекь михьи ийида ва бедендик квай артухан ядни хкудуниз куьмекда.
“Айболит” газетдай.
Гьазурайди — Надият Велиева
