Вирироссиядин “Чун санал” проектдин сергьят­ра аваз алай вахтунда дуьньяда коронавирусдихъ галаз алакъалу яз арадал атанвай гьалар фикирда кьуна, республикада хьиз, Мегьарамдхуьруьн райондани яшайишдин четин шартIара гьатай ксариз куьмек гунин крар давам жезва. ИкI, и йикъара Мегьарамдхуьруьн райондин кьил Фарид Агьмедован теклифдалди вири хуьрер мергьяматлувилин серенжемар активнидаказ кьиле тухунив эгечIнава. Идакай райондин администрациядин сайтда хабар гузва.

— Къенин четин девирда чи садвал къалурун, инсанар пакадин югъ хъсанди жедайдахъ инанмишарун,  дарда авайбуруз куьмекдин гъил яргъи авун гзаф важиблу я, — къейдзава райондин регьберди.

Мярекатдин макьсад коронавирусдин азардихъ галаз женг чIугун яз кIвалера амукьуниз, кIвалах тавуниз мажбур хьанвай, алай вахтунда яшайишдин четин шартIара гьатнавай ксариз куьмек гун я. Ахьтинбурун жергедик кьилди яшамиш жезвай ксар, гзаф аялар, инвалидар авай хизанарни акатзава. Райондин хуьрерин кьиле авай ксари ахьтин ксарин сиягьар туькIуьрнава. Мергьяматлувилин лишан яз абуруз (гъуьр, чIахар, консервияр, чай, шекер ва мсб.) авай суьрсетдин наборар пайна.

—  “Чун санал” серенжемди чи районда къени ва чарадан дердиникай хабар кьадай ксар гзаф авайди субутна. Районда мергьяматлувилин серенжемар давам жезва. Им лагьай чIал я “Хъсанвилин араба” чавай гьар садавай инлай кьулухъни къайгъударвал, мергьяматлувал авуналди ацIу­риз жеда. Чун санал хьайила, четинвилериз дурум гузни регьят жеда, — алава хъийизва чеш­меди­.

* * *

И йикъара Сулейман-Стальский райондани мергьяматлувилин нубатдин серенжем кьиле тухвана. ИкI, районда кардик квай “Рычал-яд” ­заводдин кьиле авай ксари алай вахтунда яша­йишдин  четин  шартIара  гьатнавай,  чпихъ  такьа­тар тIимил авай 200 хизандиз недай суьрсетар ­(ягълу, чай, шекер, чIахар ва мсб.) пайна.

Мергьяматлувилин серенжем кьилиз акъудуник заводдин рабочийри чпин пайни кутуна, футболдай тренер, республикадин дережадин судья Агьмед Саидагьмедова недай суьрсет авай пакетар гьар са касдив агакьарна.

Ихьтин серенжемри инсанрин руьгь хкажзава, абуруз чпин къайгъу чIугвазвай ксар авайди къалурзава. Имни абурлу ва сувабдин кар я. Къени крар ийизвай вири ксарилай Аллагь рази хьурай!

Чи мухбир