Вири дуьнья “коронавирус” лугьудай тIугъвалди завалдик кутунвайдакай чаз СМИ-рин саки вири такьатрай, ара атIун тавуна, раижзава. Хабарар, са патахъай, лап чIурубур, къалабулух кутадайбур я. Муькуь патахъай, умудлувални, рикIин инанмишвални артухарзавайбур тирдал шак алач. Гьич тахьайтIа, дуьньядин лап еке мумкинвилер авай уьлквейрив (Америка, Великобритания, мсб.) гекъигайла, чи уьлкведа инсанар чандивай ийизвай дуьшуьшар гзаф туш. Дагъустандани, амай регионрив гекъигайла, вирусдик начагъ жезвайбурун кьадар, Аллагьдиз шукур, кичIе кутадайди хьиз аквазвач. Хьунни тавурай!
Амма куь чак къурху кутазва? Чун, дагъустанвияр, патал вуч хаталу я? Низ яб гуда? Вуч авуртIа хъсан я?
Ихьтин суалар, за кьатIузвайвал, вири хизанра, зегьметчи коллективра вилик эцигзава, жавабарни гьар сада вичин саягъда гузва. Нетижаяр?..
Чи уьлкведа гьукуматдин дережада лап еке серенжемар кьабулзава. Абурукай вири телеканалрай, газетра, маса такьатра гзаф рахазва. Саки вирибуру къейдзавайвал, сифте нубатда, гьарда жува жув хуьн чарасуз я.
Инсанрин сагъламвал хуьн эвелимжи везифа яз, гьукуматди кIвалахзавай, кIелзавай, къуллугъзавай гзаф ксариз, мажибарни хвена, каникулар ганва.
Завалдин вилик пад кьун патал медицинадинни илимдин, техникадинни тадаракрин, пешекаррин вири къуватар желбнава, цIийи — цIийи дарманар арадал гъизва. ЦIийи центраяр эцигзава, духтуррин еке дестеяр желбнава…
Гьа са чIавуз гьарда вичи авуна кIанзавай чарасуз крарни ава. Месела, карантиндин вахтунда инсанри, кIвалерай экъечIна, багълариз, паркариз, мугьманвилериз физ, азар садакай масадак акатдай гьерекатар тавун, мехъерар, суварар, маса кIватI хьунар вахтуналди акъвазарун, кIвале, куьчеда, кIвалахзавай чкайра михьивал хуьн, мад маса везифаярни герек тирди къалурнава. Абурукай чи газетдани хейлин кхьенва, гьавиляй за тикрарзавач.
Тавуна кIандай крар гьибур я? Гьайиф хьи, инсаният чIехи бедбахтвилик акатнавайла, и кар чпин “бахтунихъ” элкъуьриз кIанзавай фукъиранар сакIани секин жезвач. Чебни са куьникайни я кичIевал, я регъуьвал, я са жуьрединни инсанвилин гьиссерни авачиз, майдандиз экъечIзава. Кардик кутан тийизвай сайт, канал, сеанс, малуматар, рахунар, зенгер, зендер, гьерекатар авач.
Акьван аяндарарни, суьгьуьрчиярни, тапан духтурарни, дарманар гвайбурни, экстрасенсарни гзаф хьанва хьи, абуру инсанар алдатмиш тийизвай жуьре авач. Садазни ихтибарна виже къвезвач!
Бязибуру чи шегьерра начагъвилерин тум-кьил авачирди хьиз къалурзава. Гуя мейитар кучудиз агакьзамайди туш. ЧIалахъ хьайитIа, руьгь тухудайвал я. Масадбуру базарра, туьквенра чпин къиметар твазва. Суьрсетар, дарманар, къени, чIуру лугьун тийиз, лап вини къиметриз акъуднава, уьлкведа каш тваз алахъзава. Яни секин чкада къал твазва, гьалар къизгъинариз алахъзава.
Манатдихъ гудай пекинин кIусни къизилдин къиметда туни низ хийир гузватIа заз чидач. Гзаф ава тавуна кIанзавай крар.
Са гафуналди, гьарда жува жув ва жув алай чка михьидаказ, пешекар духтурри лугьузвайвал хвейитIа, чун сабурлубур, низамлубур, инсанвилин къадир авайбур ятIа, фукъиранризни лутуйриз, нефсерин лукIаризни азарриз чка сал жеда. Азаррални зидвилерал чун гъалиб хьайибур я, мадни жедайдал шак алач. Четинвилер вахтуналди я, абурай намуслувилелди экъечIуни чун анжах къуватлу ва адлу ийида.
Чи общество виликрай тахьай жуьреда къуватлу я. Гьар юкъуз телеэкранрилай чахъ галаз уьлкведин Президент, Гьукуматдин Председатель, амай нуфузлу ксар гьикI рахазватIа яб це, дуьз нетижаяр хкуд.
Фитнейриз яб тагун, фашал рекьера жувни тежен…
Мердали Жалилов,
литературадин отделдин редактор
