Дагъустандин здравоохраненидин министерстводи республикадин медицинадин идараяр патал лазим тадаракар маса къачунин кIвалах давамарзава. ИкI, и йикъара республикадин садакай масадак акатдай азаррин центрадиз чпикай масадбурук азар акатунин хаталувал авай азарлуяр санай масаниз тухудай камераяр — биобоксар — маса къачуна агакьарнава.
Идалайни гъейри, центрадин палатайра ва дегьлизра гьавадин дезинфекция кьиле тухун патал иниз алай аямдин аппаратар ва гьаятра (патарив гвай амай чкайрани) и жуьреда михьивал авун патал техника маса къучунва, абурукай менфят къачуз эгечIнава.
РикIел хкин: мартдин эхирра садакай масадак акатдай азаррин центрадиз ИВЛ-дин цIийи 8 аппарат маса къачунай. Планрик мадни 50 маса къачун ква. Абурал алава яз, уьлкведин резервдин фондунин такьатрай — 171 аппарат.
«Лезги газет»
