Эхиримжи са шумуд юкъуз редакциядиз шекердин диабет авай ксари чпив пулсуз дарманар (инсулин, тест-полоскаяр ва рапар) агакьзавач лугьуз наразивал къалурзавай, месэладай кьил акъудун тIалабзавай зенгер авунвай.
РД-дин здравоохраненидин министерстводай чаз хабар гайивал, къенин юкъуз дарманар гьар са азарлудав агакьун патал къайгъу чIугунва. Чир хьайивал, алай вахтунда республикада инсулиндин патахъай кьитвал авач. Дагъустанда, гьакIни санлай вири дуьньяда арадал атанвай чIуру гьалар себеб яз, винидихъ тIвар кьунвай азарлуяр патал тест-полоскаяр, рапар маса къачунин кIвалах са тIимил кIеве гьатнатIани, къенин юкъуз и месэла гьялнава. Мукьвара республикадиз тест-полоскаяр ва рапар агакьда. Новорапид дармандикай лагьайтIа, ам патал кьиле тухун лазим тир аукцион гъиляй акъатнавай.
Чна виликдайни хабар гайивал, республикадин здравоохранениди гьар са дарман конкурсдин ва аукциондин бинедаллаз (виридалайни “ужуз къиметдай”) маса къачун лазим я. ИкI, РФ-да тайинарнавай законрал асаслу яз, аукцион кьиле тухун патал 1,5 варз вахт лазим къвезва. Гила лагьайтIа, вири серенжемар кьабулнава, мукьвал йикъара лазим дарманар Дагъустандиз агакьда.
Рагнеда Рамалданова
