Зи верцIи чIал

Зи верцIи чIал, захъ авай са берекат

Ваз багъишда цIарар, рикIин гьерекат.

И дуьньяда пара халкьар авазва,

Гьар миллетдиз чпиз хас чIал  багьазва.

 

Шад я гзаф зун лезгидин  тIварунал,

Дамахзава лезги гьар са гафунал.

Чаз бубайри, ирс яз, пак чIал  багъишна,

Бязибуру, куьз чи тарих  саймишдач?

 

Зи хайи чIал, чал атанвай аманат,

ЧIалахъ галаз куьз ийида адават?

Бес дидед чIал чи рикIин  къуват тушни,

РикIел хкун баркаллу  са затI тушни?!

 

Инанмиш я, лезги чIал  чи девлет я,

Дамах ква зак, зун лезгидин  велед я.

Зи верцIи чIал дегишардач  масадахъ,

Маса гумир чIал: тахьуй куь  рехъ патахъ.

«Лезги газетдин» 2020-йисан 16-нумрадай.