Хуьн чна!
Бубайри чаз тур аманат,
Дерин сирерин аламат,
Хайи дидед чIал саламат,
Ша хуьн, кутур къуьн, лезгияр!
Алпан ватан — сифте бине,
Куьрени я чIехи диде,
Лезги чIалал рахаз кIвале,
Ша хуьн, кутур къуьн, лезгияр!
Диде рахай чIал чав хайи,
Чи намусни, чак квай иви,
Квадар тийин адан ери,
Ша хуьн, кутур къуьн, лезгияр!
Зи мурад я им гьакъикъат,
Вирида сад ийин къуват,
Къвер несилриз жервал савкьат,
ЧIал хуьн, кутур къуьн, лезгияр!
Эминхуьр
«Лезги газетдин» 2020-йисан 16-нумрадай
_________________________________________________
Гъалибвилин йикъаз
Цавар, чилер, гьатта дерин гьуьлерни,
Вири кlвачел къарагънава икрамиз.
Чи гележег патал кьейи руьгьерни,
Къе чахъ гала ислягь пайдах хкажиз.
Автомат гьич вилеризни такурбур,
Ватан хуьда лугьуз, фенай дяведиз.
Куьрпе бала хьана гъиле такьурбур,
Фенай хуьнуьх тапшурмишна дидедиз.
Дяведин цlай, шумуд свас на магьрумна,
Муьгьуьббатдин экв туьхуьрна, тек туна.
Дяведин цlай, шумуд диде къазунна,
Гъиле чlулав хабар авай тел кьуна!
Алчах душманди къурмишай цlун ялав,
Кlвале-кlвале къекъвенай дерт гваз залан.
Квахьрай дяве, кьилел хьурай ислягь цав,
Мад япарихъ галукь тавуй адан ван!
Сувар я къе миллионри чан гайи,
Сурарални чан атанва къенин къуз.
Гьар са игит тlвар рикlе хуьз эбеди,
Буржлу я чун квез икрамиз уьмуьрлух!
«Лезги газетдин» 2020-йисан 18-нумрадай
___________________________________________________________________________________
Хуш туш рикlиз
Цаварай рахадай вич алаз чилел,
Тарифар ийидай гъил тухуз рикlел,
Лавгъавал, таб алай гьамиша мецел,
Инсанар хуш туш хьи, дустар, зи рикlиз.
Чир тежер авунвай гьуьрметни хатур,
Чlагуриз алахъдай вакъиа такур,
Дуьньядал зун шагь я — гатазвайбур хур ,
Инсанар хуш туш хьи, дустар, зи рикlиз.
Мецелди рахадай винелай верцlи,
Кьулухъай дабандиз кlас ядай къучи,
Инсафсуз хесетрин, рикl чlулав вагьши,
Инсанар хуш туш хьи, дустар, зи рикlиз.
Пlузаррал хъвер алаз сарари атlуз,
Халкьарив гьуьжетдай вич хан я лугьуз,
Гафуналд гъил ийир мурз алай якlуз,
Инсанар хуш туш хьи, дустар, зи рикlиз.
Гьажилеглегди хьиз хкажна кьилер,
Зайифда кьулухъай эцядай кьуьлер,
Намусдал, гьаядал ийизвай алвер,
Инсанар хуш туш хьи, дустар, зи рикlиз.
Девлетда тунавай гьамиша вилер,
Пулунихъ дидени гудай, кьаз кьинер,
Гьа гъвечlи рикlера цанавай зегьер,
Инсанар хуш туш хьи, дустар, зи рикlиз.
Алчах тир мецери турунал гъида,
Экв квахьай вилери ялавдал гъида,
Кьадарсуз нефсери кьурунал гъида,
Инсанвал хуьз алахъ, хуш жервал рикlиз!
«Лезги газетдин» 2020-йисан 24-нумрадай
______________________________________________________________________________________________________________
Шаир ва билбил
— Эй билбил, гьинай жагъанватlа ваз
И гуьзел чlалар, и ширин аваз?
Чlагай сесинал къвез завди рахаз,
Завни вугузва ягъиз тежер саз.
— Эй шаир, вун я дерзичи чIехи,
Раб, гъал галачиз заз мани цвайи.
Сес заз и чIагай гана Аллагьди,
Гьейран ийирвал халкь жуван хайи.
— Эй билбил, вуна незвачни бес фу?
Тарце аквазва заз экуьнлай вун.
Пешерин танда кIев хьана къацу,
Ракъинин кIаник ийиз жув шулу.
— Эй шаир, вучин? Им я зи кIвалах,
Вири тIебиат авун фад уях.
Ашукь хьана зи сесинал Аллагь,
Авунва закай тамарин пачагь.
Ацукьиз кукIвал, аквазва за дад
Гьар са емишдин пакамахъ лап фад.
Икьван чуьллерин хьайила пачагь,
Гишила зун гьикI амукьдатIа лагь.
— Зун ви гъавурда акьуна саки,
Ризкьи ганва ваз сад тир Аллагьди.
Ви чIаларин зун тирла дерзичи,
Бес зи зегьметдиз ни гуда гьакъи?
Сагърай зи халкь
Зи багъри халкь, зи хайи халкь,
Хайи чилни мулк хвейи халкь,
Шарвилидин квай иви халкь,
Сагърай, сагърай чи лезгияр!
Мергьяматдин квай хесетар,
КIевевайдаз гуз куьмекар,
Хуьз бубайрин пак адетар,
Сагърай, сагърай чи лезгияр!
Садвилелди ийиз кIвалах,
Безетмишиз бахчани багъ ,
Уьтквем хваяр — далудихъ дагъ,
Сагърай, сагърай чи лезгияр!
Рухваяр я дагъдин лекьер,
Ватан хуьниз гайи кьинер,
Кьиле тухуз мелни мехъер,
Сагърай, сагърай чи лезгияр!
Зи ахвар
Акуна йифиз заз диде ахварай,
Пелел гъил эцигна, заз эверзавай,
Тамарзу сесини акъудна гьарай,
Ахварай аватна зун дидедин ванцел…
Туьтуьна гьатай хьиз са кIеви мерез,
Гаф акъат тийиз зай, кьуранвай нефес,
Тамамдиз накъвари кьежирнаваз мес,
Ахварай аватна зун дидедин ванцел.
Давам хьана кIан тир ахвар заз яргъал,
Лугьурвал дидедиз жуван рикIин тIал,
Ацукьиз кIан хьанай заз адан къвалал,
Ахварай аватна зун дидедин ванцел…
Гьалал ая лугьуз хьанач гайи нек,
Вичи чал чIугур кьван азиятар тек,
Дердерив ацIанвай рикI хьана гьелек,
Ахварай аватна зун, дидедин ванцел.
Шехьмир, рикI
РикI, шехьмир, элкъвез кьулухъ килигиз,
Алатнавай йисар элкъуьр хъжедач.
РикI, шехьмир, вил вегь экуь дуьньядиз,
За сабур гуз, вун къуватдай вегьедач.
Чун кьвед сад я, санал я чи сузани,
Туькьуьл, ширин санал дадмиш авуна.
Ша кьведани чими ийин къузани,
За вахъ галаз кам къачузва агъуна.
Чун кьвед сад я, къакъуд тежер рекьидалд,
Йигин камар зайифармир вуна зи.
Гьикьван вахт я кIвалахиз са ивидалд,
Хаз алахъмир гьевес, квайла лувар зи.
Шехьмир, рикI, белки, дердер алатна,
Гьа йисарихь галаз санал лув гана,
За кьабулдач къене вун бейкеф хьана,
Зун къуватсуз и чилерал амукьна.
Шехьмир рикI, йисар ийиз тупIалай,
Къуй дердерин нагъв тахьурай вилерал,
Садакьа гуз цIийиз къвезвай йикъалай,
Къуват гуз чун къекъведа чи кIвачерал
«Лезги газетдин» 2020-йисан 32-нумрадай
_____________________________________________________
Ваз хвашкалди
Йиса садра къвезва вун чаз,
ЦIийи-цIийи хабарар гваз,
Лацу бармак кьилел алаз,
Ваз хвашкалди, чан ЦIийи йис!
ЧIагай свас хьиз къацу ёлка,
Пагь,аялриз вуч я багьа!
Безетмишиз чи кIвал,суфра,
Ваз хвашкалди,чан ЦIийи йис!
Багьа мугьман — Аяз Буба,
Савкьатар гваз ацIай чанта,
Шад ийиз чи хуьрни уба,
Ваз хвашкалди, чан ЦIийи йис!
Ахъа я ваз гьар са къапу,
Аяздикай тушиз къурху,
Йифен кьулаз къвезвай атлу,
Ваз хвашкалди, чан ЦIийи йис!
Дуьньяд гьалар чира хъсан,
Къучийриз рехъ гумир тапан,
Дережаяр гваз мад кьакьан,
Ваз хвашкалди, чан ЦIийи йис!
Эминхуьр
«Лезги газетдин» 2022-йисан 1-нумрадай
_____________________________________________
Чи Эминхуьр
Ругуд стха, дагъдин хуьрер сад хьана,
ЦIийи бине аранда мурад хьана,
Битмишай хуьр тIварцIелдини ад хьана,
Кьегьаларин Ватан я чи Эминхуьр,
Берекатдин макан я чи Эминхуьр!
Яргъи рехъни куькIвена экв — чирагъар,
Гьар куьчеда, гьар са кIвале — булахар,
Зегьметдалди ийиз жедай дамахар,
Кьегьаларин Ватан я чи Эминхуьр,
Берекатдин макан я чи Эминхуьр!
Югъ-къандавай гуьрчег жезва, авадан,
Хуьруьн къамат, яшайишни лап хъсан.
Гьуьрметдивди кьабулиз атай мугьман,
Кьегьаларин Ватан я чи Эминхуьр,
Берекатрин макан я чи Эминхуьр!
Гьар са хуьруьхъ ава вичин тарихар,
Гьар са халкьдихъ вичин игит, арифар,
Давам ийиз Эминан ирс, лайихар,
Кьегьаларин Ватан я чи Эминхуьр,
Берекатдин макан я чи Эминхуьр!
«Лезги газетдин» 2022-йисан 15-нумрадай
_____________________________________________
Къарагъ вири
Зи лезги чIал, дидедин чIал, хайи чIал,
Дидед нек хьиз, хайи къалай дадмишай.
Сифте “диде”, гаф зи мецел гъайи чIал,
Багьа савкьат я, Аллагьди багъишай.
Гьа некIедихъ галаз фена дамарриз,
Бедендини кужумна хас иви хьиз.
КьепIинамаз яб гуз дидед лайлайриз,
Гьисс авунай за чIал гьуьл, зун гими хьиз.
Гьуьлуьн гужлу лепейрилай мягькемдиз,
Сирнав ийиз тунай чIалан къудратди.
Лезги лугьуз дамах ийиз уьтквемдиз,
Завалрикай хвенай адан къуватди.
Гзаф чIалар ала, гьелбет, дуьньядал,
Виридалай зи чIал гуьрчег, масан я.
ЧIалаз къимет гузва за зи дидедал,
Ам сифте яз завди рахай инсан я.
Амма гьайиф чи аманат, хайи чIал,
Хасаратдик акатнава къенин къуз.
Кьуранва мез, на лугьуди, хьанва лал,
ЧIал гьайифдиз, къвез-къвез жезвай къуватсуз.
Бедбахтвал я им чи къвезвай несилдиз,
Куьч жезавай, туна хайи ерияр.
ЧIал квахьзава, ша куьмек гун эвердиз,
Къарагъ вири, чIал хуьн чна, лезгияр!
10.10.2021
Вине кьазва
Вине кьазва за жуван кьил,
Дагъустандин руш хьуналди.
Вине кьазва за жуван кьил,
Лезги мукан къуш хьуналди.
Вине кьазва за жуван кьил,
Гел туналди хайи чилел.
Вине кьазва за жуван кьил,
Са нин ятIан(и) къвезва рикIел.
Вине кьазва такабурдиз,
Халкьдиз герек инсан хьунал.
Къимет гузвач за абурдиз,
Эцигзавач за ам кьацIал.
Инсанвилин намусдални
За мадни кьил кьазва вине,
Жуван гунагь алцумдалди,
Гьич садазни ядач тегьне.
Лезги халкьдин хьунал векил
Уьзуьагъдиз дамахда за.
Жуван гъилелд цана техил,
ЧIалан никIер мублагьда за!
15.12.2021
«Лезги газетдин» 2022-йисан 24-нумрадай
