Малум тирвал, Россияди Гъалибвилин 75 йисан сувариз еке гьазурвилер аквазва. ЧIехи Гъалибвилик миллионралди инсанри чпин пай кутуна. Гьа гьисабдай яз, Шалбуздагъдин къуьнуьв гвай Чеперин хуьруьн агьалийрини.
Санлай къачуртIа, Чеперин хуьряй 200-лай виниз инсанар дяведиз фена. Абурукай 95 кас дяведа телеф хьана.
Ватан душмандикай хвейибурук Азизхановарни акатзава: Азизханов Желил, Азизханов Лукьман, Азизханов Сефибег, Азизханов Гьажикъули, Азизханов Межмедин ва Азизханов Мегьамед. Абурукай пуд фронтда телеф хьана, пудаз хайи хуьруьз хтун кьисмет хьана.
И макъалада заз Азизханов Межмедин Гьажикъулиевичакай (шикилда) куьруьдаказ суьгьбетиз кIанзава.
Ам 1920-йисуз Чеперин хуьре лежбердин хизанда дидедиз хьана. ГъвечIи чIавалай зегьмет чIугваз вердиш хьана. Вичин буба Гьажикъулидихъ галаз ада харат устIарвилин кеспини чирна.
1940-йисан гатфарихъ ам Яру Армиядиз ракъурна. Жегьил Украинадин Хмельницкий областдин Шепетовка шегьердин кадровый полкуниз акъатна.
Бубади рикIел хкидай, 1941-йисан мартдин вацралай сергьятдал ара-ара гъвечIи къалмакъалар жезвай.
“1941-йисан 22-июндин экуьнахъ Львов шегьердин патав гвай аэродромдилай чун яшамиш жезвай тамуз самолетрин ванер къвез башламишна. Лугьун лазим я хьи, гьа и вахтунда фашистрин Германияди Советрин Союздал гьужумнавай.
Дяве башламиш жедалди зун станковый пулеметчик тир. Женгер къизгъинбур тир. Телефвилер кьве патайни жезвай. Гзаф вахтара чна немсерин аскерар есирда кьазвай. ВикIегь аскер яз акурла, частунин командованиди зун мукьвал-мукьвал разведкадиз ракъурдай.
1942-йисан мартдин вацра, Одесса шегьердин патарив дяве фидай вахтунда, зал агъур хирер хьана ва зун хайи хуьруьз рахкурна”, — суьгьбетдай бубади дяведин йисарикай.
Уьмуьрдин юлдаш Эминова Зуьгьре Мегьамедэминовнадихъ галаз Межмедин Гьажикъулиевич 54 йисуз яшамиш хьана. Дяведин йисара Зуьгьре дидеди колхозда чуьлдин бригадирвиле кIвалахна. Абур кьведни гьукуматдин хейлин шабагьриз лайихлу хьана.
Дидейрин, бубайрин, чIехи бубайрин къаматар чи рикIера гьамишалугъ яз амукьда.
Алирза Азизханов
