Хъсан крарик кьил кутазвай, иллаки алай четин аямда хийир хкатдай, аферин ва баркалла къведай крарал машгъул тир жегьилар майдандиз экъечIуни чак руьгь кутазва, пакадин йикъахъ инанмишвал авайди тестикьарзава.

И мукьвара заз ахьтин жегьилрин дестедихъ галаз таниш жедай мумкинвал хьана. Самур Саидов, Муслим Рамазанов, Ильяс Абасов, Рафик Къурбанов, Тагьир Саидов, Саидагьмед Абасов, Расим Мирзеагъаев — Мегьарамдхуьруьн райондин Билбил хуьруьн Къазмайрин жегьилар. Чир хьайивал,  абурухъ  хуьре футболдин чIур (мини-поле) эцигдай мурад фадлай, чеб аял чIавалай авай, гила абуру и кардик кьил кутунва.

Чна инлай виликни хабар гайивал, алай вахтунда РД-дин экономикадин ва мулкар вилик ту­хунин министерствода “Чкайрилай теклифар”  (“Местные инициативы”)  тIвар алай программа  уьмуьрдиз кечирмишун гъиле кьунва.  И проект­дин макьсад  чкайрин адми­нистрацийриз ва агьа­лийриз и ва я маса тIал алай месэлаяр гьялунин карда куьмекар гун я. Программада иштиракун патал са кьадар документар гьазурун ва са жерге шартIар кьилиз акъу­дун лазим я. И крар жегьилри, за винидихъ лагьанвайвал, кьилиз акъуднава. Амма документрихъ галаз сад хьиз (программада и пунктни къалурнава), проект кьилиз акъудзавай хуьруьн агьалийри са тайин кьадар такьатар кIва­тIун (софинансирование) лазим я. Жегьилри тешкиллувилин комитет арадал гъанва. Пул кIва­тIунин кIвалахдив эгечIнава.

— Футбол къугъвадай алай аямдин (тIебии тушир чIур алай) майдан эцигун патал документар кIватIунин кIва­лах хуь­руьн ва райондин муниципалитетрихъ га­лаз санал кьилиз акъудзава. Чан сагърай и карда чаз куьмек гузвай вирибурун, — суьгьбетзава Самур Саидова.

— Санлай къачурла, туькIуьриз кIанзавай футболдин майдандин къимет тахминан 2 миллиондив агакьзава. Чи хуьруьхъ ахьтин такьатар авач. Республикада кьилиз акъудзавай госпрограммадикай хабар хьайила, чун адакай менфят къачудай фикирдал атана. Чун умудлу я, жемят­дин  куьмекдалди ва чалишмишвилералди чалай вилик эцигнавай макьсад ва аял вахтарилай рикIе авай мурад  кьилиз акъудиз алакьда.  Футболдал иллаки рикI алай жегьилрин хуьр тир чина вижевай майдан туькIуьриз жеда,   — алава хъийизва жегьилри.

Мензил рекье авайда атIуда, лугьузва бубайрин мисалда. Чун кIевелай инанмиш я, жегьилрилай чпи кьил кутунвай къени кар кьилиз акъудиз алакьда.

Рагнеда  Рамалданова