“Дербентдин хабарар” газетда чапнавайвал, и йикъара шегьер­дин мэр Хизри Абакарова сенатор Сулейман Керимован патай Ватандин ЧIехи дяведин пуд ветерандив — къадим шегьерда яшамиш жезвай Анна Азизовадив, Евгения Мезенцовадив ва Антонина Исакьовадив гьар садав са миллион манатдин сертификатар вахкана. 

“РикIел хкин: ихьтин къарар чи ватандашди ЧIехи Гъалибвилин юбилейдин вилик кьабулнай. ИкI, Ватандин ЧIехи дя­веда гъалибвал къазанмишна 75 йис тамам хьунихъ галаз алакъалу яз республикадин вири ветеранриз гьар садаз са миллион, блокадникриз ва концлагерра хьайибуруз 500 агъзур ­манат гуда”, — хабар гузва шегьердин мэриядин пресс-къуллугъди.

Къейд авун лазим я хьи, къенин юкъуз Дагъустанда Ватандин ЧIехи дяведин 82 ветеран ава.

* * *

И йикъара Сулейман Керимован патай 500 агъзур манатдин сертификат Сулейман-Стальский райондин Вини СтIалдал яшамиш жезвай Жанна Мегьамедовадивни  агакьна.

Сертификат райондин кьил Нариман Абдулмуталибова вахкана. Ада чи ватандашди михьи рикIелди авунвай ихьтин савкьат вахкун пара хуш кар тирди къейд авунихъ галаз сад хьиз, районда авай тек са агьали — блокадница тир Жанна Мегьа­медовадиз  ЧIехи Гъалибвилин 75 йис тамам хьунин юбилей тебрикна, балайри ва  хтулри яргъал йисара рикI шадарун алхишна.

Нариман Абдулмуталибова, гьакIни Жанна Мегьамедовади Сулейман Керимоваз сагърай лугьузва.

Чи мухбир