РД-дин зегьметдин ва яшайишдин жигьетдай вилик финин министерстводи “Мобильные кадры России” общественный гьерекатдихъ галаз санал и йикъара республикадин агьалийриз рекьер туькIуьрунин кIвалахра куьмекдай мумкинвал гуда. Идакай “Лезги газетдиз” винидихъ тIвар кьунвай министерстводин пресс-къуллугъди хабар гана.
Алатай жуьмя юкъуз, 3-апрелдиз, РД-дин зегьметдин ва яшайишдин жигьетдай вилик финин министр Изумруд Муьгьуьтдиновадини винидихъ тIвар кьунвай общественный гьерекатдин председатель Владислав Шамина дагъустанвияр кIвалахдалди таъминарунин жигьетдай рахунар кьиле тухвана.
Алай вахтунда вири дуьньяда садакай масадак акатдай коронавирусдин азардихъ галаз алакъалу яз арадал атанвай чIуру гьалар фикирда кьуналди, рахунар видеоконференц-алакъадикай менфят къачуна кьиле тухвана. ИкI, онлайн-режимда, алай девирда цIийивал тир къайдада, къарардал къулар чIугуна. Ида лагьайтIа, арадал атанвай шартIара кIвалахдай хатасуз рекьер-хуьлер жагъурунин, абурукай менфят къачунин жигьетдай шагьидвалзава.
Видеоконференциядин сергьятра аваз кьве патани санал кIвалахунин къайда, кIвалахдай шартIариз талукь месэлаяр ва кIвалахдихъ къекъвезвай дагъустанвийриз авай заминвилер веревирдна.
РикIел хкин: “Лезги газетдин” 26-мартдиз чапдай акъатай нумрада (“Жегьилрин бригадаяр кIватIзава” макъала) чна РД-дин зегьметдин ва яшайишдин жигьетдай вилик финин министерстводин жегьилар кIвалахдалди таъминарунин рекьяй “Агалкьун” центради Московский областдиз цIийи са шумуд рехъ туькIуьрун патал жегьилрин бригадаяр кIватIзавайдакай хабар ганай.
Чаз а муламатдал мадни алава хъийиз кIанзава: Московский областдилай гъейри, автомобилрин рекьер чи уьлкведин амай регионрани эцигун пландик ква. Гьаниз килигна, чпин яшар 18-далай алатнавай жегьилривай и важиблу проект кьилиз акъудуник чпин пайни кутаз жеда. Газетдин винидихъ тIвар кьур нумрада чна кIвалахдин шартIарикай хабар ганвай, гьавиляй чун абурал гегьеншдаказ акъваззавач.
Эгер и малуматдиз талукь яз суалар пайда хьайитIа, РД-дин зегьметдин ва яшайишдин жигьетдай вилик финин министерстводин жегьилар кIвалахдалди таъминардай “Агалкьун” центрадай чириз жеда. Ам Махачкъалада, Абубакарован куьчеда, 117-нумрадин дараматда (1-мертеба, 126 кабинет) ава.
Лазим малуматар телефондин и нумрадиз — 8 963-375-95-80 зенг авуна къачуз жеда.
Рагнеда Рамалданова
