И йикъара Ахцегь районда Дагъустан Республикадин лайихлу муаллим Магьмуд Абдулкеримован тIварунихъ галай фондунин патай агьалийриз садакай масадак акатдай азаррикай хуьдай шейэр пайна. Идакай “Лезги газетдиз” Ахцегь райондин администрациядин пресс-къуллугъдай хабар гана.
Малум хьайивал, мергьяматлувилин серенжемдин сергьятра аваз фондуни райондин хуьрера ва центрада карантиндин вахтунда кIвалахзавай коллективриз санлай къачурла, 5000 маска, 40 пачка бегьлеяр ва 300 литр антисептик пулсуздаказ пайна. ИкI, Ахцегь райондин жегьилрин волонтёррин гьерекатди просвещенидин “Люминарий” центрадин куьмекни галаз абур Россиядин МВД-дин “Ахтынский” МО-дин, медицинадин идарайрин — хуьрерин ФАП-рин, КЦСОН-дин (агьалийриз яшайишдин рекьяй куьмекдай центр), райондин школайрин штабрин арада пайна.
ЧIехи пай лагьайтIа, къенин юкъуз чпин сагъламвал хаталувилик кутуналди агьалийрин къуллугъда акъвазнавай медицинадин идарайрин къуллугъчийриз гана. ГьикI хьи, къе, арадал атанвай четин шартIара, абур чпин кIвалахдин везифаяр кьилиз акъудуниз, идахъ галаз сад хьиз чпин арада садакай масадак акатдай чIуру азар квайбурни аваз хьун мумкин тир ксарихъ галаз датIана алакъада хьуниз мажбур я. Абур пайдайла, активистри агьалийрихъ галаз гъавурдик кутунин кIвалахни кьиле тухвана, гзаф инсанар кIватI жезвай чкайриз тефин меслятна.
Мергьяматлувилин серенжемдиз Ахцегь райондин Общественный палатадин председатель Али Исмаилова виниз тир къимет гана. Ада чи уьлкведин гьар са агьали патал четинди тир алай вахтунда куьмекдин гъил яргъи авун гзаф важиблу кар тирди къейдна.
— Иллаки четин вахтара сада-садаз куьмек авуни, сада муькуьдан дердиникай хабар кьуни руьгь кутазвайди, къуват гузвайди рикIелай ракъурна кIандач. Алай девирдани чна чун гьакI тухун герек я. И серенжемдин сергьятра аваз чаз карантиндал амал авунин, гьакIни арадал атанвай чIуру гьаларай лайихлудаказ экъечIунин жигьетдай таблигъат тухуз кIанзава, — алава хъувуна ада.
Алай четин вахтунда агьвал авай ксари амайбуруз куьмекун, абурун къайгъуда хьун — им чна ата-бубайрилай инихъ авай хъсан адетрал амалзава, абур хуьзва, давамарзава лагьай чIал я. Чпин хивевай гражданвилин жавабдарвал гьисс авуналди, къени крарик кьил кутазвайбурулай, инсанрин руьгь хкажзавайбурулай Аллагь рази хьурай! Амин!
Чи мухбир
