Мегьарамдхуьруьн райондин администрациядин пресс-къуллугъди хабар гузвайвал, коронавирусдин тIегъуьн чукIунихъ галаз алакъалу яз 5-апрелдилай Урусатдинни Азербайжандин арада авай часпар михьиз агалнава. Часпардилай элячIдай ихтиярар анжах санай масаниз пар чIугвазвай улакьар (грузоперевозчики) гвайбуруз ава.
Азербайжандин коронавирусдиз акси серенжемар кьабулунай тешкилнавай штабди 4-апрелдиз 20-апрелдал кьван Урусатдихъ галаз авай часпар михьиз агалзавайдакай хабар гана. Идалай кьулухъ Азербайжандихъ галаз сергьятдал алай пропускар гузвай “Ярагъ-Къазмаяр” пунктни агална. 5-апрелдалди Азербайжандин агьалийриз и пунктунай чпин ватандиз хъфидай мумкинвал авай.
Къейд ийин хьи, Урусатдинни Азербайжандин сергьятдал Дагъустандин мулкарал пуд пункт ала: “ЦIийи Филер”, “Тагьирхуьруьн-Къазмаяр” ва “Ярагъ-Къазмаяр”. Сад лагьайди 20-мартдилай, кьвед лагьайди — 25-мартдилай агалнава. Себеб Азербайжандин патай сергьят агалун я.
«Лезги газет»
