Къе-пака гад алукьда. Им гьуьлерал, вирерал, вацIарал чуьхуьдай вахт мукьва жезва лагьай чIал я. Дагъустандин МЧС-ди алай йисан 15-майдалди цин объектрин (эхъуьн патал туькIуьрнавай чкайрин, гьуьлуьхъ галаз алакъа авай санаторийрин, ял ядай базайрин) сагьибривай хатасузвал хуьн патал къанунра къейднавай къайдайрал амал авуна, документар гьазурун, серенжемар кьабулун тIалабзава.
Идалай гъейри, объектрин хатасузвилин паспортар туькIуьрун патал МЧС-диз винидихъ къейд авур хьтин карханайрин реквизитар, хатасузвилин патахъай жаваб гузвай ксар тайинарнавай приказрин копияр агакьарун лазим я.
Эгер къанунрал амал тавуна кIвалах кьиле тухуз хьайитIа, ахьтин карханаяр РФ-дин КоАП-дин статьяйрал асаслу яз жавабдарвилиз чIугвада.
Мукъаятвал квадармир!
Гьар йисуз, гатфар алукьайла, цIаяр кьунихъ галаз алакъалу гьалар хци месэладиз элкъвезва. Гатфарихъай кьурай векьериз, зирзибилдиз цIай язавай гзафбур, гьайиф хьи, и кардив жавабдарвилелди эгечIзавач. Нетижада чIуру гьалар арадал къвезва. Зирзибилдик кутур цIай себеб яз тамар, кIвалер кана алахьай дуьшуьшарни тIимил хьанач. Гьавиляй гатфарихъай салара, багълара кIвалахзавай гьар са касди цIаярин вилик пад кьунин месэладиз кьетIен фикир гун лазим я.
Кьилди къачуртIа, ихьтин меслятрал амал авуна кIанда: цIай янавай затI кана куьтягь жедалди гуьзчивал тухун, гар авай юкъуз цIай хъувун тавун, цIай хъийизвай чка векьеривай, кIвалеривай яргъа авайди хьун…
ЦIаяр кьунин мад са себеб токдин пичер, симер къайдадик тахьун я. Гьавиляй абур датIана къайдадик хьуниз фикир гана кIанда. ГъвечIи аялар текдиз кIвале туна виже къведач. Аялрин гьерекатар себеб яз цIаяр кьазвай дуьшуьшар жезва.
Эгер цIай кьунвайдакай хабар хьайитIа, энгел тавуна, 01 ва я 112 нумрайриз зенг ая. ЦIай хкадарун патал эвелимжи серенжемар кьабула. Кузвайди дарамат яз хьайитIа, рак-дакIар агала, токдин ва газдин пичер хкуд.
РикIел хуьх, чи мукъаятвилелай гзаф крар аслу я.
М.Дибиров
