Сулейман-Стальский райондин кьил Нариман Абдулмуталибован председателвилик кваз кьиле фейи совещанида Роспотребнадзордин Управленидин Дагъус­тан Республикада авай территориальный отделдин руководитель Низами Адигуьзелова, райадминистрациядин кьилин заместителри, къурулушрин ва идарайрин руководителри, хуьрерин ­кьилери, общественный тешкилатрин ва мас­совый информациядин такьатрин векилри иштиракна.

Совещанидал федеральный  “Целди таъминарунин ва яд масанихъ акъудунин гьакъиндай” ва “Производствода ва яша­йишда жезвай амукьайрин гьакъиндай” законар районда уьмуьрдиз кечирмишунин месэлайриз килигна. Низами Адигуьзелова къейд авурвал, цихъ галаз алакъалу законди агьалияр хъсан еридин хъвадай целди таъминарунин, агьалийрин яшайиш хъсанарунин, сагъламвал хуьнин кIвалах къайдада твада. Закон уьмуьрдиз кечирмишунин сергьятра аваз тухудай серенжемрин план тестикьарнава. Ана цин чешмеяр авай гьалдал санитариядин жигьетдай гуьзчивал тухун ва инвентаризация авун, и серенжемар тайинарнавай вахтара кьилиз акъудун къалурнава. Сулейман-Стальский районда хъвадай цин 39 чешме (объект) ава. Абуру санитариядинни эпидемиологиядин жигьетдай истемишунриз жаваб гузвач. И объектрал гуьзчивал артухарун, абур элкъуьрна кIевирун, талукь документар гьазурун ва балансдал къачун чарасуз я.

Низами Адигуьзелов зирзибилдиз талукь закондин истемишунрални гегьеншдиз акъвазна.

— Мулкар яшайишдин кIеви амукьайрикай михьи авун патал региондин къайда тестикьарнава ва, РФ-дин законодательстводин истемишунар уьмуьрдиз кечирмишунин сергьятра аваз, 6 региональный оператор тайинарнава, — лагьана Низами Адигуьзелова. — Операторри яшайишдин кIеви амукьаяр, зирзибил кIватIда, улакьра аваз хутахда, гьялда, сортариз пайда, хатасуз ийида ва чилик кутада. Законодательстводин истемишунрихъ галаз кьадайвал, 2018-йисан 1-январдилай яшайишдин кIеви амукьаяр вахтуналди хуьдай ва улакьриз ядай майданрал тухуда, анлай абур Дербент райондин полигондал хутахда.

И месэлайрай совещанидал райадминистрациядин архитектурадин, эцигунрин ва ЖКХ-дин отделдин начальникдин заместитель Роберт Мейланов, образованидин управленидин начальник Къачабег Аминов, Общественный палатадин председатель Алимет Мейланов, Агъа СтIал­рин хуьруьн кьил Низами Абдурагьманов ва Курхуьруьн кьил Радик Гьажалиев ­рахана. Абуру къейд авурвал, агьалияр хъсан еридин хъвадай целди таъминарун — им алай вахтунда чкадин самоуправленидин органрин вилик акъвазнавай кьилин везифайрикай сад я. ГьикI лагьайтIа, алай вахтунда кардик квай хъвадай цин линияр ишлемишунин вахтар фад алатнава, абур бинедилай ремонт хъувунин чарасузвал ава. Идахъ галаз алакъалу яз къарар кьабулнава, планда къалурнавай мярекатар кьиле тухузва, гьар са хуьре яд къерехдиз алуддай, инвестиционный программаяр туькIуьрдай технический тапшуругърин схемаяр тестикьарнава, цин линияр михьи ийизва.

Общественный палатадин предсе­датель  Алимет  Мейланов “Сардархуьр -ДаркIуш-Къазмаяр” водоводдихъ авай метлебдал гегьеншдиз акъвазна. Ада къейд авурвал, водоводдин эцигунар акьалтIарун  чарасуз  я,  гьикI  лагьайтIа, анаг ишлемишиз вахкуни Сулейман-Стальский райондин 90 процент, гьакIни къунши районрин са шумуд хуьруьн агьалияр хъвадай хъсан еридин целди таъминарда.

Райондин образованидин управленидин начальник Къачабег Аминова лагьай­вал, образованидин идарайра санитариядинни эпидемиологиядин гьалар хъсан туш, 21 школа ва аялрин 6 бахча чкIидай гьалда ава.

Совещанидал  райондин  центральный больницадин кьилин духтур Максим Ханбалаев СПИД-дин, гьакIни инфекцияди арадал гъидай азаррин вилик пад кьун патал тухузвай кIвалахдикайни рахана.

Нариман Абдулмуталибова хуьрерин поселенийрин администрацийрин кьилерин вилик зирзибилрин хъуртар, автомойкаяр арадал тагъунин, цин месэла чкайрал гьялунин, бюджетдай бес кьадар ­пулунин такьатар чара авунин рекьерай тайин­ везифаяр эцигна.

Хазран Кьасумов