“Локомотивдихъ” галаз къугъваз башламишдалди “Анжидин” гуьгьуьлар “Анжи” Академияди гъалибчийрин Лигадиз путёвка къазанмишнава лагьай хабарди кIубанарнавай. Им Сулейман Керимован мурад тир. РФС-дин Кубокда гъалибвал ва Европадин тIвар-ван авай турнирдиз путёвка къазанмишун “академикри” Сулейман Керимоваз бахшни авуна.

“Анжидин” футболистар майдандал С.Керимован тереф хуьдай кхьинар авунвай футболкаяр алаз экъечI­на. Им анживийрин патай Сулейман Керимоваз авур гьуьрметдин лишан я. Футболкайрин далу патал “За тебя стоим стеной!”, чин патал Дагъустандин патай Федерациядин Советдин сенатордин портрет ва “Сулейман, мы с тобой!” келимаяр алай.

Къейд ийин, 2011-йисан январдилай 2014-йисан декабрдалди Сулейман Керимов “Анжи” ФК-дин иеси тир. Гьа девирда “Анжидин” тIвар виридуньядиз машгьур хьана, Дагъустандин командадик кваз дуньядин футболдин машгьур гъетер къугъваз башламишна, “Хазар” стадион кьиляй-кьилиз цIийикIа туькIуьр хъувуна, адакай “Анжи-Арена” тIвар алай комплекс арадал гъана, ам ачухдайла, Россиядин ва дуьньядин шоу-бизнесдин, эстрададин ва маса гъетер желбна…

20-ноябрдиз чи ватанэгьли Франция­дин Ницца шегьердин аэропортуна  полицейскийри  кьуна  ла­гьай­ чIуру хабар агакьна. Къейдза­вайвал, им Сулейман Керимовал хъен вегьезвай, кьасухдай авунвай кIвалах я. 23-ноябрдиз Франциядин судди С.Керимов ада замин пул турдалай кьулухъ полициядин участокдай ахкъудна, амма силис куьтягь жедалди адал   эцигнавай къадагъаяр гзаф я.

Гьайиф хьи, Россиядин чемпионатдин 18-турдин сергьятра аваз “Ростовдихъ” галаз кьиле фейи гуьруьшда “Анжи” кумукьна.

Гъалибвал

Россиядин футболдин премьер-лигадин 19-турдин сергьятра аваз “Анжи” Хабаровскдин СКА-дихъ галаз къугъвана. Им цIи хсуси чилел “Ан­жидин” эхиримжи къу­гъун­ тир.

Дагъустандин командади СКА-дин варариз кьуд (Хуан Лескано, Владимир Полуяхтов, Иван Маркелов, Игорь Армашаян) туп яна. Абурукай 3 къугъунин сад лагьай паюна.

СКА-дивай са тупни ягъиз хьанач.

ЦIи “Анжидин” эхиримжи къугъун 9-декабрдиз Москвада “Динамодихъ” ­галаз кьиле фида.

Дагъви Шериф