Дагъустандин Гьукуматда республикадин Кьилин патав гвай агъсакъалрин Советдин заседание кьиле фена. Мярекат ачухай Советдин председатель Абдулла Мегьамедов цин важиблувиликай рахана ва ада агъсакъалар кIватIунин себебни и месэла веревирд авунихъ галаз алакъалу тирди къейдна.
— 1969-йисуз Дагъустанда 159 бузлах (ледник) авай ва абуру 47 квадратный километрдин майдан кьазвай. Чпин яцIувал 20-100 метр тир. Алай вахтунда амайди 132 бузлах я ва абуру 18,6 квадратный километр майдан кьазва, чебни гзаф кьелечI хьанва, — фикир желбна А. Мегьамедова.
Мярекатда иштиракай РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Ибрагьим Къазибегова кар алай доклад авуна. Ада Махачкъаладин ва патав гвай посёлокрин агьалияр хъвадай целди таъминарун патал гьеле авунвай ва ийизвай кIвалахрикай гегьеншдиз суьгьбетна. Къизилюрт шегьерда, Къизилюрт ва Къумторкъала районра циз талукь месэла гьялун авай гьалдикай рахана. Министрди Чепел-Мегьарамдхуьр, Къайтагъ-Дагъустандин Огни (1-пай) ва Самур-Дербент (1-пай) чIехи водоводрин эцигунар акьалтIарнавайдини къейдна.
Ибрагьим Къазибегова республикада хъвадай циз талукь маса месэлайрикайни агъсакъалар хабардарна.
Заседанидал кар алай “2018-2023-йисара Дагъустан Республикадин агьалияр хъвадай целди таъминарун” программа гьазуруниз талукь месэлани веревирдна.
«Лезги Газет»
