Вичикай гележегда шофер хьуникай Вилимета гьеле мектебда кIелзавай йисара фикир ийиз хьанай. ЧIехи чкайра кIелун, маса пешедин иеси хьун адан рикIел къведачир. Шофер хьунин мурадди адан рикIе мягькем чка кьунвай. Адаз Алидхуьруьн колхозда, гьа вахтунда кардик акатна худда кIвалахзавай Кьасумхуьруьн консервиярдай заводда машинри майишатдин кIвалахра иштиракун, яр-емиш, салан майваяр дашмишун вичин вилералди гьар юкъуз аквазвай.
1936-йисуз дидедиз хьайи Вилимет и чIавуз фагьум-фикир хци хьанвай, писни-хъсан чара ийиз алакьзавай жегьил тир. Мектебдин йисар алатайла, ада вичин рикIевайвал авуна, шофервилин пеше чирна. 1955-йисуз ам машиндин рулдихъ ацукьна. Адал сифтедай “ГАЗ-51” маркадин автомашин ихтибарна. КIвалахни лагьайтIа, гьа вахтара вичин ятаралди тIвар машгьур хьанвай “Рычал-Су” заводда ийиз эгечIна. Адаз галатун вуч кар ятIа чидачир, гьакьван рикI алай касдин вичин кеспидал. КIвалахни адан жавабдарди тир. Ада гагь Туладай, гагь Краснодардай, гагьни Невинномысскдай цик кутазвай газ хкизвай. КIвалах гежел тевгьедайди, жавабдарди тир. Вилимета лагьайтIа, садра чкадал хкайди куьтягь жедалди, гуьгъуьналлаз нубатдин рейсни ийидай, кIвалах акъваздай дуьшуьшриз садрани рехъ гудачир.
Инал са кар мадни къейдна кIанзава. Буюрмишнавай кIвалах хъсандиз кьилиз акъудзавайди, гьа са вахтунда физ-хквезвай рекьерни яргъалбур тирди фикирда кьуналди, Вилиметав “ГАЗ-53”, ахпа “ЗИЛ-130” маркадин машинар вугана. Гила кIвалахдин бегьерлувал ва кьадарни хейлин артух хьана. Вилимет коллективда кIвенкIвечий-рин жергедиз акъатна.
Ам 1958-йисуз КПСС-дин членвиле кандидат яз, са йисалайни членвиле кьабулна. Адал общественный жавабдар кIвалахарни ихтибарна. Галаз-галаз са шумуд сеферда Вилимет Керимович хуьруьн ва райондин советриз депутатвиле хкяна, адан шикил республикадин Гьуьрметдин доскадиз акъудна. Гила адан жавабдарвал мадни артух хьана. Бегьерлувилелди вич вердиш хьанвай тегьерда кIвалахун кIвенкIвечи Вилимета яргъал йисара давамарна. Гаф атай чкадал лугьун, вичив гвай техникани ада хъсан гьалда аваз хуьзвай, анжах вич гелкъвез , туькIуьр хъийизвай.
Гьукуматди адан гьакъисагъ зегьмет “Зегьметдин Баркалладин орден”, “Зегьметдин ветеран” тIвар, социалистический соревнованидин гъалибчивилин знакар гуналди къейдна. Ада 16 йисуз заводдин партийный организациядин секретарвални авуна, коллективда зегьметдин низам мягькемариз екез куьмекна. 2007-йисуз Вилиметаз Октябрдин социалистический революциядин 90 йис тамам хъьунин, мукьвара лагьайтIа, Россиядин халкьарин садвилин суварин юкъуз, Октябрдин инкъилабдин 100 йисан юбилейдин махсус знак гана.
Вилимет Керимович 1990-йисуз пенсиядиз экъечIна. ЯтIани общественный краривай яргъаз хьанвач. Ада гьар жуьредин мярекатра, гуьруьшра иштиракзава, чкадин телевиденидай тербиядин, экологиядин месэлайрай рахазва, жегьилриз насигьатар гузва. Адаз гъвечIи — чIехи гьар сада гьуьрметзава. Вилимет 14 хтулдинни 16 птулдин чIехи буба я. Абуру адан рикI хъсан краралди шадарзава.
Райсудин Набиев
