Гьуьрметлу “Лезги газетдин” редакция!
Зун гъиле къелем кьуниз мажбурайди Рутул райондин Хъуьлуьдрин хуьруьн жемят я.
Квезни малум тирвал, Кьиблепатан Дагъустандин районрин са бязи хуьрер хуьруьн майишатдин продуктар, иллаки келемар битмишарунал машгъул я. Келем арадал гъун гьихьтин жафа алай кIвалах ятIа, ам цазвай ксариз хъсандиз чида. Советрин девирда чна и продукт Бакудин базарда маса гузвай, къазанжиярни жезвай. Гьа келемралди хизанни хвена, амукьай кьве манат гьукуматдин кассайрани эцигзавай.
Гила лагьайтIа, эхиримжи 3-4 йисан къене и продукт, къачудай муьштери тежез (гадарай йисарни хьана), пуч жезва. Гьа ихьтин татугайвилер себеб яз, хуьре са кепек кьванни гъилиз гъидай кар-кеспини тахьайла, иллаки жегьилар хизанарни галаз яргъара яшамиш жезва. Алай вахтунда дапIар яна агалнавай кIвалер, къалгъан акьалтнавай никIер хуьре гзаф хьанва. И гьалда давам хьайтIа, хуьрерал аламукьдайди са тIварар я. Эгер келемрихъ са бубат къимет хьайитIа, патал яшамиш жезвай жегьилар хуьрериз хкведайдахъ чун инанмиш я. Белки, Дагъустандин вахтуналди хьанвай цIийи регьбердин куьмекдалди, Азербайжандин талукь руководстводихъ галаз са меслятдал атана, келемар чавай къачудай икьрар жен. Чна куь куьмекдалди чи мурад кьилиз акъатуник умуд кутазва.
Жемятдин тIалабуналди чар кхьейди С-А. Абдурашидов я.
