Уьлкведин Президентдин теклифдалди Ватандин ЧIехи дяведин ветеранриз гьар садаз 75 агъзур манат пул гунин къарар кьабулнава. Им лап хъсан кар хьанва. Баркаллу ветеранар гьар гьихьтин хьайитIани, гьуьрметриз чIехи шабагьриз лайихлу я.
Ватандин ЧIехи дяведин ветеранар чахъ тIимил ама, абурун жергеяр йисалай-суз кьери жезва. Гзаф хуьрера, районра абур ерли амач. Бязи шегьеррани абур тупIаралди гьисабиз жеда. Им, гьелбетда, гьайиф къведай кар я.
Ватандин ЧIехи дяведин ветеранрикай ихтилат кватнавай и арада чи гьукуматди мад са важиблу кардиз фикир ганайтIа, хъсан жедай: дяведин йисарин аялризни кьезилвилер гун. Абурун кьисмет гзаф заланди, туькьуьлди хьана. И месэла 6 йис идалай вилик Госдумади гъиле кьунай. Амма адал кIукI гъаначир. Зунни дяведин йисарин аялрикай я. Четинвилер, дарвилер гзаф акуна. Фу авачиз, хъчар недай вахтар хьана. Зун хьтинбур хуьрера, шегьерра вишералди, агъзурралди ава. Къе чунни ветеранар я. Госдумади гила кьванни дяведин аялрин месэладиз фикир гана, абурузни са куьмекдин гъил яргъи авунайтIа, хъсан кар жедай.
Райсудин Набиев
