Курхуьруьн М. Рагьимован тIварунихъ галай 1-нумрадин юкьван школадиз ери-бине и хуьряй тир, алай вахтунда Китайдин Халкьдин Республикада яшамиш жезвай ва кIвалахзавай Имран Фазилович Рагьимов мугьман хьана.
ЧIехи бубадин тIварунихъ галай школадин муаллимрихъ ва кIелзавайбурухъ галаз кьиле фейи гуьруьшдал ада вичин уьмуьрдин рекьикай, Китайда тухузвай яшайишдикай, кIвалахдикай, гьакIни анин агьалийрин адетрикай итижлу, метлеблу рахунар авуна. Гьа са вахтунда вичиз теклиф авунай муаллимриз чухсагъул лугьунихъ галаз санал Имран Рагьимова школьникриз хъсандиз кIелуниз, бубайрин баркаллу крариз вафалу хьуниз эвер гана, кIелзавайбурун суалриз — жавабарни.
Имран Рагьимова Махачкъалада юкьван школа, Россиядин таможенный академия ва юриствилин пешедай магистратура акьалтIарна. Им пуд лагьай йис я ада Китайда (Пекин шегьерда) ингилис чIалан муаллим яз кIвалахиз. Имраназ китай чIални чизва.
Школадиз мугьман хьунай, метлеблу гуьруьш тешкилунай мектебдин кьиле авайбуру, муаллимри ва кIелзавайбуру Имран Рагьимоваз чухсагъул лагьана.
Хазран Кьасумов
