Чи бубайрин яшайишдай

Вилик вахтара чи хуьрерин агьалийри гьатта къаб-къажахдин ериндани дуланажагъда къванерикай менфят къачузвай. Шикилдай аквазвайди тIебии къванцикай инсанди туькIуьрнавай бади я.

Ихьтин къванцин бадийра вилик вахтара дарманрин набататар, абурун дувулар гатадай, регъведай. Чизвай ксари къейдзавайвал, абура арадал гъайи дарманрихъ кьетIен таъсирлувал жедай. Ихьтин бадияр, адет яз, инсанри, кутугай къванцин къен акъудна, арадал гъизвай. Гзаф ишлемишуникдини къен къвердавай герек кIалубдиз къвезвай.

Итижлу делилрикай сад ам я хьи, эгер хъенчIин, чепедин къапарай, кутаррай фер акъатайтIа, къванцин бадида какайрин хъире, къиб ва чеб (дагъдин накьв)  хъсандиз какадарна, арадал атай ширишдин куьмекдалди къапар галкIур хъийизвай.

Къапарин еринда ишлемишай къванер чи хуьрера исятдани амачиз туш. Мисал яз, вацIун элкъвей истил, марчил къванерин куьмекдалди серг ва маса затIар гатадай.

«Лезги газет»