Алай йисан эвелдин делилралди, Дагъустанда “Хуьруьн муаллим” (“Земский учитель”) программадин сергьятра аваз 95 муаллим патал кIвалахдин азад чкаяр ава, хабар гузва программадин официальный www.zemteacher.edu.ru сайтди.
РикIел хкин, “Хуьруьн муаллим” программа уьлкведин Президент Владимир Путинан теклифдалди кардик кутунва. Адан сергьятра аваз муаллимри хуьруьн ва я агьалийрин кьадар 50 агъзур касдилай артух тушир шегьердин мектебда 5 йисан вахтунда кIвалахунин гьакъиндай икьрар кутIунзава. Икьрардин бинедаллаз, асул ставкадилай гъейри, муаллимдиз алава яз 1 миллион манат гузва.
Дагъустандин властриз алай йисуз и программадин сергьятра аваз 130 муаллим кIвалахдин чкайралди таъминардай фикир ава. Алай вахтунда Дагъустанда 95 муаллимдиз кIвалахдин чкаяр азад я. Тамам сиягь сайтдай жагъуриз жеда. И сайтдай квевай муниципалитетдиз ва я мектебдиз талукь делиларни жагъуриз, гьакIни кIвалахиз гьазур тирдан гьакъиндай арза рекье тваз жеда. Къейд ийин, чIехи пай игьтияжар ингилис ва урус чIаларин, математикадин муаллимрихъ галаз алакъалубур я.
2019-йисуз “Хуьруьн муаллим” программадин сергьятра аваз Дагъустанда 50 муаллим кIвалахдалди таъминарнава. Еке дикъет проектдиз региондин педвузар акьалтIарнавай жегьил пешекарри гузва.
РикIел хкин, программадин шартIаралди, адан иштиракчияр жегьил ва я чпин яш 50 йисалай виниз тушир, гьам Дагъустандай ва гьамни республикадин къерехдай тир муаллимар хьун лазим я.
«Лезги газет»
